BRİTANİYA ŞAHZADƏSİ ÇARLZ 58 YAŞINDA ÜÇ RÜTBƏYƏ SAHİB OLMUŞDUR

16.11.2006 [10:53]
Çap et
A⁺ A^-

AZƏRTAC xəbər verir ki, Britaniya taxt-tacının varisi, Uels şahzadəsi Çarlz noyabrın 14-də - 58-ci doğum günündə eyni vaxtda üç böyük hədiyyə almışdır. Həmin gün şahzadənin müxtəlif qoşun növlərində rütbəsi artırılmışdır. Kraliça II Elizabetin böyük oğlu Quru Qoşunlarının generalı, Kral Hərbi Dəniz Qüvvələrinin admiralı, Böyük Britaniya Hərbi Hava Qüvvələrinin Baş marşalı olmuşdur.

Yeri gəlmişkən, Böyük Britaniya hərbi rəislərinin heç birinin son dövrdə və eyni vaxtda rütbələri bu cür artırılmamışdır.

Çarlz fəal hərbi karyerasını 30 il əvvəl “Bronniqton” minaaxtaran gəmisinin kapitanı rütbəsində başa çatdırmışdır.

Hakim sülalənin silahlı qüvvələrdə xidmət keçən üzvlərinin hərbi rütbələri, əslində, avtomatik artırılır. Buna görə də zaman keçdikcə onlar çox yüksək hərbi rütbələrin sahiblərinə çevrilirlər.

Tarixçilər bildirirlər ki, Britaniya kralları qoşunlarını son dəfə döyüşə 250 il əvvəl aparmışlar.