Britaniyada dəmir yollarının rəhbərliyi yenidən dövlət nəzarətinə qayıdır
London, 20 may, AZƏRTAC
Böyük Britaniyada dəmir yollarının rəhbərliyi yenidən dövlət nəzarətinə qayıdır.
AZƏRTAC xəbər verir ki, hökumət, dəmir yollarına rəhbərliyi yenidən ələ aldığını, infrastruktur, tariflər və bilet satışlarına nəzarət ediləcəyini, dəmir yolu xidmətlərinin yaxşılaşdırılacağını və biletlərin daha ucuz satılacağını açıqlayıb. Hazırda ölkədə dəmir yolu xətləri müxtəlif özəl şirkətlər tərəfindən idarə olunur. Bu isə həm infrastruktur təhlükəsizliyi, həm xidmət keyfiyyəti, həm də bilet qiymətləri baxımından illərdir böyük narazılıqlara səbəb olub.
Plana əsasən, 2023-cü ilə qədər “Böyük Britaniya Dəmir Yolları” adı ilə yeni dövlət qurumu yaradılacaq. Qatarların tarifləri, qiymətləri, bilet satışı və dəmir yolu infrastrukturunun saxlanılması və təmiri üçün məsuliyyət bu quruma aid olacaq. Həmçinin özəl şirkətlər də yeni tənzimləmədə bir çox səyahət əməliyyatlarını həyata keçirəcəklər.
Əslində 2019-cu ildə açıqlanması gözlənilən plan ümumi seçkilər və koronavirus səbəbi ilə təxirə salınıb.
Qeyd edək ki, dəmir yollarının özəlləşdirilməsi qərarı Marqaret Tetçer hökuməti tərəfindən qəbul edilmişdi.
Aynurə Tağıyeva
AZƏRTAC-ın xüsusi müxbiri
London
Bölmənin digər xəbərləri
