BRİTANİYALI SƏYAHƏTÇİLƏR BAKIYA GƏLMİŞLƏR
İyulun 11-də Bakının Xətai rayonunda yerləşən “Bakı SOS Uşaq Kəndi”ndə məşhur “Ceneral Motors DEU” avtomobil şirkətinin “SOS Kinderdorf İnterneşnl” beynəlxalq təşkilatı ilə birgə keçirdiyi “DEU sərgüzəştləri” xeyriyyə yürüşünün iştirakçıları mətbuat konfransı keçirmişlər. Böyük Britaniyalı səyahətçilər - jurnalist Riçard Meredit və mühəndis-geoloq Fil MakNerney Londondan Seuladək məsafəni 80 gün ərzində qət etməklə ərazisindən keçdikləri ölkələrdə kimsəsiz uşaqların vəziyyətini öyrənir, onların timsalında bu dövlətlərin öz gələcəklərinə necə münasibət bəslədiklərini beynəlxalq ictimaiyyətə çatdırırlar. Səyahətçilər öz marşrutlarına iyunun 9-da London yaxınlığındakı Luton şəhərindən başlayıblar. Bu günədək onlar 14 ölkəni və təxminən 9 min kilometr məsafəni qət ediblər. Yürüş iştirakçılarının sözlərinə görə, marşrutun ümumi uzunluğu təxminən 20 min kilometr olacaqdır. Səyahətçilər “Ceneral Motors DEU” şirkəti tərəfindən bu aksiyaya 30 min avro məbləğində maddi yardım ayrıldığını bildirdilər. Yürüşün sonunda şirkətin etdiyi maliyyə yardımı ilə dünyanın ən kasıb ölkələrindən olan Nepalda Uşaq Kəndinin və Ailə evinin tikilməsi nəzərdə tutulur.
