Bu gün Livandan İsrail ordusunun mövqelərinə on mərmi atılıb
Bakı, 28 sentyabr, AZƏRTAC
Şənbə günü Livan ərazisindən İsrail ordusunun mövqelərinə azı on mərmi atılıb.
AZƏRTAC xəbər verir ki, bu barədə İsrail Silahlı Qüvvələrinin mətbuat xidməti məlumat yayıb. Bildirilir ki, Livandan İsrail ərazisinə uçan mərmilər aşkarlandıqdan sonra Yuxarı Qaliley rayonunda həyəcan siqnalı səslənib. Bir neçə mərmi havada zərərsizləşdirilib.
Bir müddət öncə İsrail Hərbi Hava Qüvvələri Livanın paytaxtı Beyrutda “Hizbullah” hərəkatının qərargahının yerləşdiyi rayona ağır bombalarla zərbə endirib. Ərəb mediasının məlumatına görə, hücum zamanı nə hərəkatın lideri Həsən Nəsrullah, nə də digərləri xəsarət almayıb.
İsrailin Beyrut və Livanın bəzi digər ərazilərinə hava zərbələri cümə günü axşamdan bəri aramsız davam edir. Livan Səhiyyə Nazirliyinin məlumatına görə, paytaxtın sıx məskunlaşdığı ərazidə bir neçə bina dağıdılıb, azı 6 nəfər ölüb, onlarla insan yaralanıb.
Bölmənin digər xəbərləri
