Bu il ABŞ-ın gündəlik neft istehsalı 11,2 milyon barel olacaq
Bakı, 16 may, AZƏRTAC
Birləşmiş Ştatların 2021-ci il üzrə sutkalıq xam neft hasilatına dair proqnoz artırılıb.
AZƏRTAC ABŞ-ın Enerji İnformasiya Administrasiyasının (EIA) məlumatına istinadla xəbər verir ki, cari ildə ölkədə neft istehsalının sutkada 11,2 milyon barel olacağı nəzərdə tutulur. Əvvəlki proqnoz 11 milyon barel idi.
2022-ci ildə isə Birləşmiş Ştatların sutkalıq neft hasilatının 11,8 milyon barel təşkil edəcəyi gözlənilir. Ötənaykı proqnoz 11,9 milyon barel idi.
EIA “Light” markalı xam neftin qiymətindəki artım gözləntiləri səbəbindən istehsalçıların mövcud quyulardakı azalmaları kompensasiya etmək üçün yeni quyular qazacağını proqnozlaşdırır. Administrasiya Meksika Körfəzindəki yeni layihələrin də ABŞ-da neft istehsalındakı artıma kömək edəcəyini bildirib.
Qeyd edək ki, keçən il ABŞ-da gündəlik neft hasilatı 11 milyon 290 min barel təşkil edib.
ABŞ 2018-ci ilin noyabrında Səudiyyə Ərəbistanı və Rusiyanı geridə qoyaraq dünyanın ən böyük xam neft istehsalçısı olub.
Bölmənin digər xəbərləri
