Ceff Bezos varidatı 200 milyard dolları keçən ilk insan kimi tarixə düşüb
Bakı, 26 avqust, AZƏRTAC
Dünyanın ən varlı insanı, “Amazon” kompaniyasının rəhbəri Ceff Bezos varidatı 200 milyard dolları keçən ilk milyarder kimi tarixə düşüb.
AZƏRTAC bu barədə “Forbes” jurnalının tərtib etdiyi və real vaxtda milyarderlərin varidatını izləyən “Forbes Real-Time” reytinqinə istinadla xəbər verir.
Bununla yanaşı qeyd edilir ki, Ceff Bezos bu göstəricidə möhkəmlənə bilməyib və hazırda onun varidatı 199,7 milyard dollar təşkil edir. Lakin hətta bu qiymətləndirmə belə onun üçün yeni rekorddur - iyul ayının əvvəlindən bu yana “Amazon” kompaniyasının sahibinin varidatı daim artır.
Ceff Bezos bu göstəriciyə “Amazon” aksiyalarının bahalaşması nəticəsində nail olub. Avqustun 25-nə olan məlumata əsasən, kompaniyanın aksiyası 1,18 faiz bahalaşaraq 3346,49 dollara, kapitallaşması isə 1,68 trilyon dollara çatıb. “Amazon” aksiyalarının 11,1 faizi Ceff Bezosa məxsusdur və o, 2017-ci ildən “Forbes” jurnalının dünyanın ən varlı insanları reytinqinə başçılıq edir.
Qeyd edək ki, dünyanın ən iri online-reiteylerlərindən biri olan “Amazon” kompaniyası ABŞ-la yanaşı Çin, Braziliya, Yaponiya, həmçinin Avropa ölkələrində fəaliyyət göstərir. “Amazon.com” internet mağazası 1995-ci ilin iyul ayından fəaliyyətə başlayıb.
Bölmənin digər xəbərləri
