CƏMİYYƏT
Cəlilabad rayonunda baş vermiş yol-nəqliyyat hadisəsi nəticəsində iki nəfər ölmüşdür
Bakı, 14 noyabr (AZƏRTAC). Noyabrın 14-də səhər saatlarında Cəlilabad rayonunda ağır yol-nəqliyyat hadisəsi baş vermişdir.
Fövqəladə Hallar Nazirliyindən AZƏRTAC-a bildirmişlər ki, Ələt-Astara magistral yolunun 137-ci kilometrliyində, Cəlilabad rayonu ərazisində “LADA PRİORA” və “VAZ” markalı minik avtomobilləri toqquşmuşdur.
Hadisə nəticəsində “LADA-PRİORA” markalı avtomobilin sürücüsü Elvin İmanov və sərnişin Kamil Alışov hadisə yerində ölmüş, digər sərnişin və “VAZ” markalı avtomobildə olan iki nəfər müxtəlif dərəcəli xəsarətlər almışlar. Nazirliyin hadisə yerinə cəlb olunmuş xilasediciləri müvafiq alət və avadanlıq vasitəsilə cəsədləri və yaralıları deformasiyaya uğramış avtomobillərdən çıxarmışlar.
Hadisə ilə bağlı müvafiq qurumlar tərəfindən araşdırmalar aparılır.