Cəlilabadda oğurluqla məşğul olan şəxslər polis əməkdaşları tərəfindən tutulublar
Bakı, 5 may, AZƏRTAC
Aprelin 19-da Cəlilabad rayonunun Günəşli kənd sakini X.Kərimova Rayon Polis Şöbəsinə müraciət edərək bir gün əvvəl saat 22 radələrində yaşadığı evə girmiş naməlum şəxsin evin divarına tüfəngdən atəş açaraq hadisə yerini tərk etdiyini bildirib.
Daxili İşlər Nazirliyinin mətbuat xidmətindən AZƏRTAC-a bildiriblər ki, müraciətlə əlaqədar dərhal müvafiq tədbirlər görülüb. Hadisəni oğurluq məqsədilə törətməkdə şübhəli bilinənlər - Alar kənd sakinləri S.Hüseynov və əvvəllər məhkum olunmuş K.Əliyev polis əməkdaşları tərəfindən saxlanılıblar.
K.Əliyevdən müvafiq sənədləri olmayan, nömrəsi silinmiş “İJ-16” markalı ov tüfəngi və heroin aşkar edilərək götürülüb. Aparılmış tədbirlərlə onların rayon ərazisindəki daha dörd evdən pul və qızıl-zinət əşyaları oğurlamaları, bir evdən isə oğurluğa cəhd göstərmələri də müəyyən edilib.
Faktla bağlı araşdırma aparılır.
Bölmənin digər xəbərləri
