Cənub bölgəsində bayram əhval-ruhiyyəsi yaşanmaqdadır
Lənkəran, 24 mart, Bağır Əliyev, AZƏRTAC
Cənub bölgəsində Novruzun ab-havası, bayram əhval-ruhiyyəsi yaşanmaqdadır. Bayramla əlaqədar ölkəmizdə 7 günlük qeyri-iş gününün olması cənub bölgəsində fəaliyyət göstərən turizm və istirahət mərkəzlərində əsl canlanma yaradıb.
AZƏRTAC-ın bölgə müxbiri xəbər verir ki, cənub bölgəsindəki istirahət mərkəzlərinin qiymətlərdə endirimlər etməsi bu əraziyə turist axınını artırıb. Adi günlərdə hər bir turistin istirahəti 50-150 manata başa gəlirdisə, bayram günlərində 25-30 faiz endirimlər edilib.
Bölgəyə gələn turistləri ən çox cəlb edən bu yerlərin dağları, meşələri, çayları və yerli mətbəxidir. Turizm obyektləri Avropa standartlarına uyğun inşa edildiyindən və burada dincələnlərə xidmət mədəniyyəti yüksək olduğundan turistlər bu gözəl məkandan qayıtmağa tələsmirlər. Hazırda rayonun istirahət mərkəzlərində boş yer yoxdur.
Bayram günlərində istirahət mərkəzlərində təşkil edilmiş mədəni-kütləvi tədbirlərdə turistlər də yaxından iştirak edirlər. Onlar milli paltar geyinmiş qız və oğlanlarla birlikdə tonqalın ətrafında yallı gedir, bayram sevincini birgə yaşayırlar. Turistlər rəqs qruplarının və yerli sənətkarların ifalarını, Novruzun atributları olan Bahar qızının, Kosanın və Keçəlin məzhəkəli oyunlarını, qədim adət-ənənələri yüksək qiymətləndirirlər.
Turistlərə xidmət səviyyəsinin yüksəldilməsi, istirahət mərkəzlərində müxtəlif əyləncəli proqram və konsertlərin təşkil edilməsi burada dincələnlər tərəfindən razılıqla qarşılanır. Onlar istirahət mərkəzlərində yaradılan şəraitdən də razı olduqlarını bildirirlər. Turistlərdən bir neçəsi bayram təəssüratlarını bizimlə bölüşüb.
Şirinxanım Səmədova (Şirvan şəhəri): “Dördüncü dəfədir Lənkəranda oluram. Hər il yay mövsümündə bu yerlərə istirahətə gəlirəm. Bu il isə Novruz bayramını cənub bölgəsində keçirməyə qərar verdim. Düşünürəm, qərarımda yanılmamışam. Qaldığım “Palıdlı Sahil” istirahət mərkəzində turistlərin mənalı istirahət etməsi üçün hər cür şərait yaradılıb. Qiymətlər əladır, cibimizə uyğundur. Burada həm istirahət etmək olur, həm Novruz şənlikləri gözəl keçir. Cənub bölgəsinin adət-ənənələri çox gözəldir. Mən gənclərə məsləhət görərdim ki, bayramları öz ölkəmizdə keçirsinlər”.
Yerli turistlərlə yanaşı, xarici qonaqlar da razılıqlarını bildiriblər. Bölgədə əsasən İran İslam Respublikasından gəlmiş turistlər üstünlük təşkil edir.
Sara Abbasi (İranın Tehran şəhəri): “İlk dəfədir Azərbaycanda oluram. Ailəliklə Novruzu Azərbaycanda keçirmək qərarına gəldik. Seçimimiz uğurlu oldu. Xəzər dənizi sahilində yerləşən istirahət mərkəzində hər şey gözəldir. Bayram günlərində keçirilən şou-proqramlar ürəyimizcə oldu. Çox sevinirik.”
Tehrandan Parsa Məhəmmədi, Mehsa Abbasi, Şadi Neməti, Şirazdan Aminə Kaini də istirahət mərkəzində yaradılan şəraitindən razı qaldıqlarını, Novruzu əsl bayram kimi qeyd etdiklərini bildiriblər. Aminə Kaini deyib: “Biz də ailəliklə Novruz günlərini Lənkəranda keçiririk. Lənkəranın çox gözəl təbiəti var. Bir tərəfdən dəniz, digər tərəfdən dağlar, meşələr insanı heyran edir. Bölgənin insanları qonaqpərvər və mehribandır. Hələ də içimdə sevinc, bir bayram əhval-ruhiyyəsi var”.
Turistlərə bölgə və Şərq mətbəxi ilə yanaşı, Avropa mətbəxindən də müxtəlif təamlar təqdim olunur.
Lənkəran Turizm və İnformasiya Mərkəzinin direktoru İlqar Əzimovun verdiyi məlumata görə, Novruz bayramı günlərində ölkəmizin cənub bölgəsinə 5000 nəfərədək turist gəlib. Bu, ötən ilin müvafiq dövrü ilə müqayisədə 20 faiz çoxdur. Turistlərdən 1500 nəfəri İran İslam Respublikasının vətəndaşlarıdır.
Cənub bölgəsinin turizm obyektlərində və istirahət mərkəzlərində bayram tədbirləri tətilin sonunadək davam etdiriləcək.
Bölmənin digər xəbərləri
