QAN YADDAŞI
Cənub bölgəsində Xocalı soyqırımı qurbanlarının xatirəsi ehtiramla yad olunub
Astara, 26 fevral, Bağır Əliyev, AZƏRTAC
Fevralın 26-da ölkəmizin hər yerində olduğu kimi, cənub bölgəsində də Xocalı soyqırımının 25-ci ildönümünə həsr olunmuş anım mərasimləri keçirilib.
AZƏRTAC xəbər verir ki, Astara rayonunun rəhbər işçiləri, idarə, müəssisə və təşkilatların nümayəndələri, müharibə veteranları, yaşlı nəslin, gənclərin və ictimaiyyətin təmsilçiləri “Şəhidlər” abidə-kompleksinin, həmçinin burada uyuyan qəhrəmanların məzarları önünə gül dəstələri düzərək, Azərbaycanın suverenliyi və ərazi bütövlüyü uğrunda şəhid olanların xatirəsini dərin hüznlə anıblar.
Mərasimdə şəhidlərin ruhuna dualar oxunub.
Rayon icra hakimiyyətinin məsul işçisi, “Xocalım ağrım mənim” kitabının müəllifi Mərasim Hacızadə bildirib ki, iyirminci əsrin ən ağır faciələrindən biri olan Xocalı faciəsi bəşər tarixində analoqu olmayan soyqırımı, Azərbaycan xalqının qan yaddaşına həkk olunmuş acı bir kədər, dərin üzüntüdür.
Qeyd olunub ki, 1992-ci il fevralın 25-dən 26-na keçən gecə erməni silahlı qüvvələri keçmiş sovet ordusunun Xankəndi şəhərində yerləşən 366-cı motoatıcı alayının zirehli texnikası və hərbi heyətinin köməyi ilə Xocalı şəhərini işğal ediblər.
Hücumdan əvvəl, fevralın 25-i axşamdan başlayaraq səhər saat 5-dək toplardan və ağır zirehli texnikalardan şiddətli atəşə tutulan şəhər darmadağın edilib və yandırılıb. Həmin vaxt üç istiqamətdən hücuma məruz qalan Xocalıda olan təqribən 2500 nəfər əhali şəhəri tərk edərək Ağdam rayonu istiqamətində qaçmağa məcbur olub. Lakin, əhalinin qarşısı erməni silahlı dəstələri və motoatıcı alayın hərbçiləri tərəfindən kəsilərək güllə-borana tutulub. Xocalılıların çox hissəsi məhz Əsgəran-Naxçıvanik düzündə xüsusi qəddarlıqla öldürülüb.
Diqqətə çatdırılıb ki, Xocalı faciəsinə hüquqi və siyasi qiymət ümummilli lider Heydər Əliyevin rəhbərliyi ilə 1994-cü ildə verilib.
Azərbaycan Respublikasının Prezidenti İlham Əliyevin uğurlu xarici siyasəti nəticəsində artıq dünya dövlətləri və beynəlxalq təşkilatlar Ermənistanı işğalçı dövlət kimi tanıyır. Heydər Əliyev Fondu Xocalı həqiqətlərinin dünyaya çatdırılması, qətliama obyektiv qiymət verilməsi istiqamətində atılan addımları uğurla davam etdirir. Məhz Fondun gərgin əməyi nəticəsində indi dünya ölkələri erməni qəsbkarlarının insanlığa sığmayan qətlləri haqqında daha dolğun məlumatlandırılır. Fondun vitse-prezidenti Leyla Əliyevanın təşəbbüsü ilə “Xocalıya ədalət” beynəlxalq informasiya və təşviqat kampaniyasının məqsədi dünya ictimaiyyətini Xocalı faciəsi ilə bağlı məlumatlandırmaq, qətliama hüquqi-siyasi qiymət verilməsinə və bu qanlı qırğının qurbanlarının xatirəsinin anılmasına nail olmaqdır. Bu xeyirxah əməl uğurla davam etdirilir.
Mərasim iştirakçıları abidə-kompleksinin önündə təşkil edilmiş Xocalı soyqırımından bəhs edən rəsm, foto və kitab sərgisi ilə tanış olublar.
Astara Rayon Mədəniyyət Mərkəzinin bədii özfəaliyyət kollektivlərinin ifasında Xocalı soyqırımı ilə bağlı ədəbi-bədii kompozisiya nümayiş etdirilib.
X X X
Lənkəran şəhərində azərbaycanlıların soyqırımı qurbanlarının xatirəsinə ucaldılmış abidə-kompleksi önündə anım mərasimi keçirilib.
AZƏRTAC xəbər verir ki, rayonun rəhbər işçiləri, hüquq-mühafizə orqanlarının, idarə, müəssisə və təşkilatların, ictimaiyyətin nümayəndələri, tələbələr, məktəblilər, şəhər sakinləri abidə-kompleksi önünə tər qərənfillər düzərək, faciə qurbanlarının xatirəsini dərin hüznlə yad ediblər.
Mərasimdə gənclərin ifasında “Bu qan yerdə qalan deyil!” adlı ədəbi-bədii kompozisiya nümayiş olunub.
Anım mərasimi Heydər Əliyev Mərkəzində davam etdirilib. Tədbir iştirakçıları Mərkəzin foyesində Xocalı faciəsinə həsr olunmuş rəsm sərgisi ilə tanış olub, sənədli filmə baxıblar.
X X X
Fevralın 26-da Masallı şəhərindəki “Qəhrəmanlar parkı”nda Xocalı soyqırımının 25-ci ildönümünə həsr olunmuş anım mərasimi keçirilib.
AZƏRTAC xəbər verir ki, rayon rəhbər işçiləri, idarə, müəssisə və təşkilatların nümayəndələri, veteranlar, ağsaqqallar, ziyalılar, gənclər, məktəblilər, Xocalıdan olan məcburi köçkünlər və şəhər sakinləri abidə önünə gül dəstələri düzərək, faciə qurbanlarının xatirəsini ehtiramla yad ediblər.
Mərasimdə soyqırımı qurbanlarının ruhuna dualar oxunub, Xocalı faciəsinin dəhşətlərini əks etdirən ədəbi-bədii kompozisiya təqdim olunub.
X X X
Yardımlıda Xocalı faciəsinin 25-ci ildönümünə həsr olunmuş anım tədbirin iştirakçıları “Şəhidlər” abidə-kompleksinin önünə gül dəstələri düzərək, Azərbaycanın suverenliyi və ərazi bütövlüyü uğrunda şəhid olanların xatirəsini ehtiramla yad ediblər.
AZƏRTAC xəbər verir ki, mərasimdə çıxış edən rayon icra hakimiyyətinin başçısı Ayaz Əsgərov ermənilərin Azərbaycan xalqına qarşı etdiyi törətdiyi vəhşiliklərdən, soyqırımından danışaraq, Xocalı faciəsini XX əsrin ən qanlı cinayəti kimi dəyərləndirib.
Diqqətə çatdırılıb ki, düşmən tapdağı altında olan torpaqlarımız, o cümlədən Xocalı şəhəri Prezident İlham Əliyevin apardığı doğru, düzgün və məqsədyönlü siyasət nəticəsində tezliklə azad olunacaq.