Cənubi Koreya Prezidenti Mun Ce-inin reytinqi rekord səviyyəyə yüksəlib
Bakı, 8 may, AZƏRTAC
Cənubi Koreya Prezidenti Mun Ce-inin dəstək reytinqi may ayının ilk həftəsində 2018-ci ilin iyulundan bəri rekord səviyyəyə - 71 faizə yüksəlib.
AZƏRTAC xəbər verir ki, bu barədə “Gallup Korea” tədqiqat agentliyinin məlumatında deyilir. Tədqiqatın nəticələrinə əsasən, Mun Ce-inin populyarlığı ötən həftə ilə müqayisədə 7 faiz yüksəlib. Regionlar üzrə ən yüksək dəstək Çolla-Pukto əyalətinin Kvancu şəhərində (92 faiz), ən aşağı dəstək isə ölkədə koronavirus epidemiyasının əvvəlki episentri - Tequ şəhərində və Kensan-Pukto əyalətində (53 faiz) qeydə alınıb. Prezidenti dəstəkləyən koreyalıların əksəriyyəti 40-50 yaş qrupu arasındadır.
2019-cu ildə Cənubi Koreya liderinin reytinqi 40-50 faiz arasında dəyişirdi. 2020-ci ildə hökumətin COVID-19 epidemiyası ilə mübarizədə əldə etdiyi uğurlu nəticələrdən sonra əhalinin ölkə prezidentinə dəstəyi artmağa başladı. Dəstək reytinqinin artmasına, həmçinin Demokratik partiyanın parlament seçkilərində qələbəsinin də təsiri olub.
Sonuncu dəfə Mun Ce-inin 71 faizlik dəstək səviyyəsi 2018-ci il iyul ayının ilk həftəsində qeydə alınmışdı. Bu nəticə, həmçinin ölkənin əvvəlki prezidentlərinin hakimiyyətlərinin üçüncü ilindəki göstəriciləri arasında da rekorddur.
Eyni zamanda, Cənubi Koreya vətəndaşlarının 21 faizi prezidentin fəaliyyətini mənfi qiymətləndirir. Bu, əsasən iqtisadi problemlərin tam həll edilməməsi ilə bağlıdır.
Siyasi güclər arasında isə hakim Demokratik partiyanın reytinqi 46 faiz, mühafizəkar “Gələcəyin birləşmiş partiyası”nın reytinqi isə 17 faiz təşkil edir. Cənubi Koreyada aprelin 15-də keçirilən parlament seçkilərində demokratların alyansı 180 mandatla mütləq çoxluğu qazanıb və hazırda bir neçə deputatın partiyanı tərk etməsindən sonra 177 mandatı əlində saxlayır.
Qeyd edək ki, tədqiqat mayın 6-dan 7-dək telefon vasitəsilə bütün ölkə ərazisində aparılıb. Sorğuda 18 yaşdan yuxarı 1004 nəfər iştirak edib.
Bölmənin digər xəbərləri
