Cənubi Koreyada karantin rejimi yumşaldılır
Pekin, 3 may, AZƏRTAC
Cənubi Koreyada son günlər yeni növ koronavirusa (COVID-19) yoluxma hallarının azalması fonunda martın sonlarından tətbiq olunan karantin rejimi gələn həftədən yumşaldılacaq.
AZƏRTAC Yonhap agentliyinə istinadla xəbər verir ki, bu barədə Baş Nazir Çunq Sye-kyun hökumətin COVID-19 pandemiyası ilə mübarizəsinə həsr olunan iclasında deyib. O, mayın 6-dan etibarən kütləvi tədbirlərin təşkilinə sanitar-gigiyena qaydalarına əməl olunmaq şərti ilə icazə veriləcəyini bildirib. Hökumətin karantin rejiminin yumşaldılması qərarı ilə məktəblərdə dərslərin bərpasına da başlanılacaq. Dərslərin başlanması ilə bağlı qaydalar mayın 4-də açıqlanacaq.
Qeyd edək ki, Cənubi Koreya hökuməti bir müddət əvvəl açıqlama yayaraq, ölkədə gündəlik virusa yoluxma hallarının 50-dən aşağı düşəcəyi təqdirdə karantin rejiminin yumşaldılacağını bildirmişdi. Son 25 gündür ki, Cənubi Koreyada yoluxma hallarının sayı 50-dən aşağı olub. Ötən sutkada isə bu rəqəm 13 olub. Səhiyyə qurumları isə xarici mənşəli yoluxma hallarının çoxalmasından narahatdırlar. Onlar, həmçinin COVID-19 virusunun dərmanının olmaması səbəbindən bir müddət sonra yoluxma dalğasının təkrarlana biləcəyindən ehtiyat edirlər.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
