Bakı, 11 may (AZƏRTAC). Mayın 13-də Çelyabinskdə S.Prokofyev adına konsert zalında vilayətin yaradıcı uşaq və gəncləri arasında Azərbaycan xalqının ümummilli lideri Heydər Əliyevin anadan olmasının 90 illiyinə həsr edilmiş “Rusiya-Azərbaycan: dostluq qanadlarında” adlı festival-müsabiqənin qaliblərinin qala-konserti olacaqdır.

Çelyabinskdəki “Ozan” Azərbaycan Mədəniyyət Mərkəzindən AZƏRTAC-a verilən məlumata görə, improvizə edilmiş konsert səhnəsi birbaşa foyedə təşkil ediləcəkdir.

30 dəqiqəlik fasilə müddətində müsabiqənin diplomantları olan balaca pianoçular, fleytaçılar, akkordeonçular, xalq və estrada mahnılarının ifaçıları konserti davam etdirəcəklər.

Filarmoniyanın “Harmoniya” qalereyasında gələcək rəssamların əsərlərin sərgisi açılacaqdır.

Çelyabinsk vilayətinin Mədəniyyət Nazirliyi, Təhsil və Elm Nazirliyi, Çelyabinsk şəhər Administrasiyasının Mədəniyyət İdarəsi, Xalqlar Dostluğu Evi, Gənclər Siyasəti Baş İdarəsi, Çelyabinsk Dövlət Mədəniyyət və İncəsənət Akademiyasının dəstəyi ilə “Ozan” Azərbaycan Mədəniyyət Mərkəzi və Ümumrusiya Azərbaycanlılar Konqresinin regional bölməsi tərəfindən təşkil edilmiş bu müsabiqə 2013-cü ilin yanvar ayında başlamış və üç mərhələdən ibarət olmuşdur.

Müsabiqənin seçim turunda Cənubi Ural bölgəsini təmsil edən 300-dən çox məktəbli və tələbə iştirak etmişdir. Yaradıcılıq işləri beş nominasiya üzrə qiymətləndirilmişdir: xoreoqrafiya, vokal, instrumental janr, təsviri incəsənət və diyarşünaslıq.

“Dostluq qanadlarında” müsabiqəsinin xüsusiyyəti ondan ibarətdir ki, əksəriyyətinin heç vaxt Azərbaycanda olmamış uşaqlar bu müsabiqədə öz bacarıq və istedadlarını nümayiş etdirməklə bərabər, həm də Azərbaycan adlı uzaq dost ölkəni özləri üçün bir növ kəşf edə biləcəklər. “Bakıda qürub çağı” adlı rəsm çəkmək və ya “Qarabağ çobanları” adlı oynaq rəqsi təsvir etmək üçün Azərbaycanın harada yerləşdiyini, bu ölkənin keçdiyi tarixi yolu, orada yaşayan insanları, Heydər Əliyevin nə səbəbdən Azərbaycan xalqının ümummilli lideri olmasını təsəvvür etmək lazımdır. İnsanların bir-birini incəsənət vasitəsilə, xalq yaradıcılığı vasitəsilə tanıması qarşılıqlı anlaşma və dostluğun ən qısa yoludur. Çelyabinsk festivalının orbitinə cəlb edilənlərin hamısı - müsabiqənin iştirakçıları da, tamaşaçılar da, münsiflər heyətinin üzvləri də bunu etiraf edirlər. Onlar çox səmimi, emosional, ürəkdən gələn sözlər deyirlər.

Angelina Akatyeva - Çelyabinsk Dövlət Mədəniyyət və İncəsənət Akademiyasının 5-ci kurs tələbəsi, xoreoqraf:

- Mənim bəxtim gətirib. “Rusiya-Azərbaycan: dostluq qanadlarında” festival-müsabiqəsi ən əlamətdar hadisədir. Bu müsabiqə insanın öz zəkasını, peşə vərdişlərini, dünyagörüşünü zənginləşdirməsi üçün bir şansdır. Birinci kurs tələbələri ilə “Böyük bayram yallısı” adlı rəqs nömrəsi hazırlamaq üçün çoxlu videomateriallara baxmaq, bu ölkənin tarixini, siyasi strukturunu, coğrafiyasını tədqiq etmək lazım gəldi. Bu, çox maraqlı idi. Hər bir xalqın öz xarakteri, məxsusi ifa manerası vardır. Bəs bütün bunları rəqsin dili ilə necə çatdırmalı? Azərbaycan Dövlət Rəqs Ansamblının üzvləri Çelyabinskə gələrkən onların necə gözəl rəqs etdiklərini görmüşdüm. İncə, qəşəng, sehrli-sirli qadın obrazları insanı heyran edirdi. Kişilərin çılğın və emosional rəqsləri tamaşaçını cəzb edən xüsusiyyətləri ilə fərqlənirdi. Bizim birinci kurs tələbələri bu incəlikləri duymağa və tamaşaçıya çatdırmağa çalışmışlar.

Konstantin Fokin - çelyabinskli rəssam, Rusiya Rəssamlar İttifaqının üzvü, Çelyabinsk Dövlət Mədəniyyət və İncəsənət Akademiyasının tətbiqi yaradıcılıq kafedrasının müdiri:

- Mənim tələbələrim müsabiqə tapşırıqları üzərində işləyəndə mən də nə isə etmək istədim. Bu, maraqlı mövzudur. Mən heç vaxt Azərbaycanda olmamışam, lakin Peterburqda oxuyarkən bakılı rəssam dostlarım çox olub. Olduqca mədəni, istedadlı insanlardır. Ətraf aləmə və başqa mədəniyyətlərə münasibətdə açıq və həssasdırlar. Məsələn, heykəltəraş dostlarım eyni rəngin müxtəlif çalarlarına, formanın qeyri-adiliyinə valeh olur, musiqini çox yaxşı duyurdular. Mən onlardan çox şey öyrənmişəm. Festival-müsabiqə Azərbaycan xalqının ümummilli lideri Heydər Əliyevə həsr edilmişdir. Azərbaycanda ona çox böyük hörmət bəsləyirlər. O, ümummilli qəhrəmandır, çünki öz ölkəsi üçün, sadə insanlar üçün çox iş görmüşdür. SSRİ dövründə Heydər Əliyev ən hörmətli siyasətçilərdən, keçmiş Siyasi Büroda ən yüksək intellektə malik olan şəxslərdən biri idi. Dərhal görünürdü ki, bu olduqca sanballı, savadlı və mədəni insandır. Həmişə inandırıcı şəkildə danışırdı, həmişə, hətta Rusiya Azərbaycan xalqına münasibətdə özünü yetərincə vicdanlı aparmadığı vaxtlarda da Rusiya ilə dostluq siyasəti yeridirdi. “Dostluq qanadlarında” müsabiqəsinin Heydər Əliyevə həsr edilməsi çox düzgün qərardır.

Rəfail Quliyev, müsabiqənin təşkilatçısı, Çelyabinsk vilayətindəki “Ozan” Azərbaycan Mədəniyyət Mərkəzi İctimai Təşkilatının sədri, iqtisad elmləri namizədi:

- Mən istəyirdim ki, çoxmillətli Çelyabinsk vilayətinin gənc nəsli bu böyük insanı tanısın və yadda saxlasın. Heydər Əliyev olduqca uzaqgörən siyasətçi, parlaq natiq, qarşıya qoyduğu məqsədə doğru dönmədən və qətiyyətlə irəliləmək bacarığına malik olan şəxsiyyət idi. Ermənistan-Azərbaycan, Dağlıq Qarabağ münaqişəsinin dinc yolla və ədalətli tənzimlənməsi üçün onun yeritdiyi strateji xətt sayəsində 1994-cü ildə münaqişə zonasında atəşkəs haqqında razılaşma əldə edilmişdir.

Müxtəlif millətlərdən olan insanlar sakit və rahat yaşadığı yeni Azərbaycanı Heydər Əliyev yaratmışdır. Nəsillər dəyişəcək, lakin qədirbilən insanlar Heydər Əliyevi həmişə böyük azərbaycanlı - görkəmli şəxsiyyət və ümummilli lider kimi yad edəcəklər.

Ruslan Xabibulin, müsabiqənin münsiflər heyətinin sədri, beynəlxalq müsabiqələr laureatı, Çelyabinsk Mədəniyyət və İncəsənət Akademiyasının estrada-orkestr yaradıcılığı kafedrasının müdiri, professor:

- Mən özüm Bakıdanam, 1969-cu ildə Çelyabinskə oxumağa gəlmişəm, o vaxtdan burada yaşayıram. Çox şadam ki, gənc artistlər və tamaşaçılar məhz burada, Uralda böyük Azərbaycan mədəniyyəti ilə bu cür ciddi, səmimi maraqla tanış ola biləcəklər, Heydər Əliyevlə bağlı mənim də şəxsi xatirələrim var, şadam ki, ona həsr edilmiş festivalda mən də iştirak edəcəyəm.

Mən Heydər Əliyevi ilk dəfə 60-cı illərdə, onun Azərbaycan KP MK-nın birinci katibi vəzifəsinə yenicə seçildiyi dövrdə görmüşəm. O vaxt mən Bakıda yaşayırdım. Heydər Əliyev xalqla görüşərkən biz komsomolçular asayişə nəzarət edirdik. Son dərəcə ağıllı, savadlı, qətiyyətli, öz ölkəsinin və xalqının təəssübkeşi olan bu insan əsl lider idi. Onun hakimiyyətə gəlişindən sonra Azərbaycanda həyat nəzərəçarpacaq dərəcədə dəyişdi, sənaye və mədəniyyət sahələri inkişaf etməyə başladı: yeni zavodlar və fabriklər tikildi, elektrik stansiyaları və neft mədənləri, suvarma və nəqliyyat sistemləri yaradıldı. Bakıda metro açıldı, əzəmətli memarlıq kompleksləri, institutlar, nəşriyyatlar yaradıldı, görkəmli insanlara abidələr ucaldıldı, böyük tarixi şəxsiyyətlərin ev-muzeyləri yaradıldı. Mənim fikrimcə, Heydər Əliyevin siyasəti sayəsində azərbaycanlılar harada yaşadıqlarını, kim olduqlarını dərk etməyə başladılar... Mənim qardaşım, qohumlarım indi də Bakıda yaşayırlar. Onlar Heydər Əliyev haqqında həmişə çox səmimi sözlər söyləyirlər.

Mən şadam ki, “Ozan” Azərbaycan Mədəniyyət Mərkəzi “Rusiya-Azərbaycan, dostluq qanadlarında” adlı festival-müsabiqə təşkil etmişdir. Bu tədbirdə bu qədər istedadlı gənclərin və onların müəllimlərinin iştirak etməsi çox xoşagələn haldır. Bu o deməkdir ki, həmin insanlar Azərbaycan musiqisi və rəqsləri ilə tanış olmağa, ən qədim milli mədəniyyətlərdən birinin tarixini öyrənməyə, Azərbaycanın zəngin təbiəti ilə tanış olmağa maraq göstərirlər. Azərbaycan xalqı çox səxavətli xalqdır. Bizim gənclərin çoxu Azərbaycan dilini öyrənir. Əminəm ki, biz yanaşı yaşayan xalqların ənənələri və mədəniyyəti barədə nə qədər çox öyrənsək, aramızda qarşılıqlı anlaşma bir o qədər dərin olacaqdır. Əgər hər bir milli mərkəz bu cür festivallar təşkil etsəydi, biz uşaqlarımızın və nəvələrimizin gələcəyi üçün bir o qədər arxayın olardıq.

Eleonora Mixalçenko, Çaykovski adına İncəsənət İnstitutunun dosenti, Rusiyanın əməkdar mədəniyyət işçisi:

- Mənə xoşdur ki, bizim uşaqlar Azərbaycan bəstəkarlarının musiqisini çalır və oxuyurlar. Başqa xalqın yaradıcılığı ilə tanış olmaq həmişə faydalıdır. Bu, yeni repertuar, qeyri-adi kolorit və ifadəli rəng çalarları deməkdir. Bizim Cənubi Uralda yaşayan azərbaycanlıların sayı barədə heç vaxt fikirləşməmişəm. Biz Azərbaycan mədəniyyəti ilə tanış olmuşuq, onlar bizim mədəniyyətlə. Bu, qarşılıqlı hörmət, dostluq, Rusiya ilə Azərbaycanı bir-birinə bağlayan 200 illik tarixə hörmət deməkdir. Bir-birimizin incəsənətinə və tarixinə maraq göstərməyimiz bizi qarşılıqlı zənginləşdirir.

Mayın 13-də Çelyabinsk vilayət filarmoniyasının səhnəsində keçiriləcək qala-konsertin proqramına festivalın ən yaxşı müsabiqə nömrələri daxil edilmişdir. Bakılı qonaqların - Azərbaycanın əməkdar artisti Vaqif Mirzəyev (klarnet), II Respublika Muğam Müsabiqəsinin qalibi Aytən Məhərrəmova, Satira Teatrının bədii rəhbəri Vüqar Abdulov və populyar estrada müğənnisi Nadir Qafarzadənin çıxışları bu konsertin bəzəyi olacaqdır.

Qaliblərin mükafatlandırılması yəqin ki, qala-konsertin ən həyəcanlı anları olacaqdır. “Ozan” Mədəniyyət Mərkəzinin rəhbəri Rəfail Quliyevin sözlərinə görə, heç kəs mükafatsız və hədiyyəsiz qalmayacaqdır. Qran-pri sahibləri isə Bakı şəhəri Mədəniyyət və Turizm İdarəsinin rəisi Əlikram Əliyevin şəxsində Azərbaycan Respublikası Mədəniyyət və Turizm Nazirliyinin dəvəti ilə mayın 14-də Bakıya yola düşəcək, orada Azərbaycan xalqının ümummilli lideri Heydər Əliyevin 90 illiyinə həsr edilmiş konsertdə iştirak edəcəklər.