ÇİMKƏNDDƏ AZƏRBAYCAN MUSİQİSİ FESTİVALI KEÇİRİLMİŞDİR
Cənubi Qazaxıstan vilayətinin mərkəzi Çimkənd şəhərində Azərbaycanın müstəqilliyinin 11-ci ildönümünə həsr olunmuş musiqi festivalı keçirilmişdir. Çimkənddəki “Dostluq evi”ndə keçirilən festivalda vilayətdə fəaliyyət göstərən Azərbaycan mahnı və rəqs ansamblları iştirak etmişlər.
Festivalı Çimkənddəki Azərbaycan mədəniyyət mərkəzinin sədri İslam Qurbanov açaraq demişdir ki, belə musiqi bayramlarının keçirilməsini soydaşlarımız razılıqla qarşılayırlar. Ona görə də biz həmişə dövlət və milli bayramlarımızı həmvətənlərimizin iştirakı ilə təntənəli şəkildə qeyd edilir.
Daşkənddən xüsusi olaraq festivala dəvət olunmuş qonaq - Azərbaycanın Özbəkistandakı səfiri Aydın Əzimbəyov soydaşlarımızı bu bayram münasibətilə təbrik etmiş, belə təşəbbüsləri alqışladığını bildirmişdir. O demişdir: - Belə festivallar və musiqi bayramları keçirmədən milli mənəvi dəyərlərə əməl etmək çətindir.
Sonra Azərbaycan mahnı və rəqslərindən ibarət geniş konsert proqramı göstərilmişdir. Qərib Xəlilov, Kamilə Məhəmmədiyeva, Günay Hacıyeva, Arzu Fətullayeva və başqalarının oxuduqları muğam, təsnif və xalq mahnıları alqışlarla qarşılanmışdır.
Qulu Kəngərli
AZƏRTAC-ın xüsusi müxbiri
Çimkənd
Bölmənin digər xəbərləri
