Çində 5,1 bal gücündə zəlzələ olub VİDEO
Pekin, 6 aprel, AZƏRTAC
Çinin cənub-qərbindəki Siçuan vilayətində 5,1 bal gücündə zəlzələ olub.
AZƏRTAC Çin Seysmologiya Şəbəkələri Mərkəzinin məlumatına istinadla xəbər verir ki, zəlzələ yerli vaxtla səhər saat 7:50-də (Bakı vaxtı ilə 3:50) İbin şəhərində qeydə alınıb.
Zəlzələ ocağı yer səthindən 10 kilometr dərinlikdə olub.
Hələlik tələfat barədə məlumat yoxdur. Sosial şəbəkələrdə yayılmış videolarda müxtəlif təyinatlı tikililərə ziyan dəydiyi, divarlarda çatların yarandığı, bəzi yollarda torpaq sürüşmələrinin meydana gəldiyi görünür.
Qeyd edək ki, bu son illər İbin şəhəri ərazisində qeydə alınan ilk zəlzələ deyil. 2019-cu il iyunun 17-də baş vermiş 6 bal gücündə zəlzələ nəticəsində 13 nəfər ölmüş, 200-dən çox adam yaralanmışdı. Həmin vaxt zəlzələnin törətdiyi fəsadlarla əlaqədar 80 min sakin təxliyə edilmişdi.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
