ÇİYİD SƏPİNİ UĞURLA DAVAM ETDİRİLİR
Regionların sosial-iqtisadi inkişafı Dövlət Proqramına uyğun olaraq Ağdaşda pambıqçılığın inkişaf etdirilməsi ilə əlaqədar son illər məqsədyönlü tədbirlər həyata keçirilir. Rayon icra hakimiyyətindən AZƏRTAC-ın müxbirinə bildirmişlər ki, keçən il 1531 hektar sahədən 2309 ton pambıq toplayan torpaq mülkiyyətçiləri bu il əkin sahələrini 2000 hektara çatdırmaq əzmindədirlər. Bu məqsədlə 2000 hektarda keyfiyyətli şum aparılmış, sahələr arata qoyulmuşdur. Ciddi hazırlıqdan sonra bütün ərazi bölgələrində çiyid səpini kampaniyasına başlanmışdır. Hər gün sahələrə 30 malaçəkən traktor, 18 səpin aqreqatı çıxarılır. Az vaxt ərzində 920 hektarda əkin aparılmışdır. Səpində yerli şərait üçün daha əlverişli olan “Ağdaş-3” sortlu toxumdan istifadə edilir. Çiyid səpinini optimal müddətdə, yüksək aqrotexniki qaydada başa çatdırmaq məqsədi ilə bütün qüvvələr səfərbər edilmişdir.
Bölmənin digər xəbərləri
