DAHA BİR QƏTL HADİSƏSİNİN ÜSTÜ AÇILMIŞDIR
Daxili İşlər Nazirliyinin mətbuat xidmətindən AZƏRTAC-a bildirmişlər ki, martın 4-də Cəlilabad rayonu Göytəpə şəhərinin Ə.Hüseynov küçəsində yaşayan Həmidulla Ağayevin və onun arvadı Xədicənin meyitləri evlərində tapılmışdır. Məlum olmuşdur ki, mərhumlar bıçaqla qətlə yetirilmişlər.
Qətli törətmiş Yardımlı rayon sakini İlqar Məmmədov Cinayət Axtarışı Baş İdarəsi və Cəlilabad Rayon Polis Şöbəsi əməkdaşlarının birgə keçirdikləri əməliyyat-axtarış tədbirləri nəticəsində tutulmuşdur.
Xəbər verildiyi kimi, martın 1-də Sumqayıt şəhəri ərazisində Abşeron rayon sakini Vaqif Veyisovun meyiti tapılmışdır.
Sumqayıt Şəhər Polis İdarəsi əməkdaşlarının faktla bağlı keçirdikləri əməliyyat tədbirləri nəticəsində V.Veyisovun şəhər sakini, əvvəllər məhkum olunmuş Kamil Ələkbərov tərəfindən küt alətlə qətlə yetirildiyi müəyyən edilmiş və qatil həbs edilmişdir.
Hər iki hadisə ilə bağlı cinayət işi açılmışdır, araşdırmalar aparılır.
Bölmənin digər xəbərləri
