DANAÇI KƏNDİNDƏ YENİ POÇT BİNASI İSTİFADƏYƏ VERİLDİ
Regionların sosial-iqtisadi inkişafına dair Dövlət proqramına uyğun olaraq, Rabitə və İnformasiya Texnologiyaları Nazirliyinin maliyyə vəsaiti ilə tikilən yeni binanın açılış mərasimində çıxış edənlər milli rabitəmizin inkişaf yolundan, bölgələrdə rabitə xidmətləri şəbəkəsinin genişləndirilməsi və müasirləşdirilməsi istiqamətində həyata keçirilən tədbirlərdən danışmış, kənd əhalisinin sosial vəziyyətinin yaxşılaşdırılmasına yönələn bu işləri yüksək qiymətləndirmişlər.
Zaqatala Poçtamtının rəisi Namidə Süleymanova AZƏRTAC-ın müxbiri ilə söhbətində bildirmişdir ki, müəssisənin kollektivi cari ilin birinci yarısını uğurlu göstəricilərlə başa vurmuş, tarif gəliri üzrə proqnoz tapşırıqlarına 118,4 faiz əməl olunmuşdur. Ötən ilin müvafiq dövrü ilə müqayisədə 61,7 milyon manat çox, yəni 312,8 milyon manat gəlir əldə edilmişdir.
Hazırda şəhərdə yerləşən 5 nömrəli poçt şöbəsi üçün müasir tipli yeni binanın tikintisinə başlanmışdır.
