“DAŞKƏSƏN FİLİZSAFLAŞDIRMA” ASC-NİN BAŞ MÜHƏNDİSİ MÜZAYƏDDİN HƏSƏNOVUN ÇIXIŞI
Hörmətli Mehriban xanım!
Sizi bütün daşkəsənlilər və Daşkəsən ağsaqqalları adından salamlayır və “Xoş gəlmisiniz!” deyirəm.
Bu gün Daşkəsəndə hər bir ailədə bayramdır. İlk dəfə olaraq, ölkəmizin Prezidenti Daşkəsənə gəlmişdir. Möhtərəm Prezident, xalq Sizi çox sevir. Ona görə sevir ki, Siz xalq üçün çalışırsınız. Bu gün Azərbaycan və dünya ictimaiyyəti bilir ki, Siz yaradıcı, qurucu Prezidentsiniz. Ona görə də Siz xalqımızın ən sevimli oğlusunuz.
Hörmətli Prezident!
Mən 1968-ci ildə Azərbaycan Neft və Kimya İnstitutunu bitirərək, bu müəssisəyə işləməyə gəlmişəm. Fəhləlikdən müəssisənin baş mühəndisi vəzifəsinə qədər yüksəlmişəm. Demək olar ki, müəssisənin inkişaf tarixinin canlı şahidiyəm. Daşkəsən rayonunun iqtisadiyyatının əsasını bu müəssisə təşkil edir. Daşkəsən camaatının bütün həyatı bu müəssisə ilə bağlıdır. Ulu öndərimiz Heydər Əliyevin dağ rayonlarının iqtisadiyyatının inkişaf etdirilməsi barədə Sərəncamından sonra müəssisəmiz daha da gücləndi. Onun inkişaf dövrü də 1970-80-ci illərə təsadüf edir. Lakin 1980-ci illərin sonu - 90-cı illərin əvvəlində respublikaya rəhbərlik edən səriştəsiz adamların fəaliyyəti nəticəsində ölkəmizin iqtisadiyyatı iflic vəziyyətinə düşdü. Həmin dövrdə bizim müəssisəmizin də fəaliyyəti dayandı. Səmimi etiraf edirəm ki, bu müəssisənin dayanması bütün Daşkəsən rayonunda həyatın donması demək idi. Müəssisəmizin fəaliyyətinin dayandığı 15 il ərzində daşkəsənlilər ümidlərini itirməyərək, onun yenidən işə düşəcəyini gözləmişlər. Ancaq biz inanmırdıq ki, belə bir gün gəlib çatar. Ona görə də Daşkəsən camaatı bu gün ikiqat bayram hissi keçirir. Allaha şükürlər olsun ki, Sizin rəhbərliyiniz, işgüzarlığınız və xeyir-duanızla Daşkəsən filizsaflaşdırma müəssisəsi işə düşdü.
Cənab Prezident, Siz bayaq o düyməni basmaqla təkcə müəssisəyə deyil, bütün Daşkəsən rayonuna yeni həyat, yeni ruh bəxş etdiniz. Respublikanın ağır sənayesi yeni inkişaf mərhələsinə qədəm qoyur. Hazırda burada 300 nəfər daşkəsənli çalışır, yüksək əməkhaqqı alaraq rahat yaşayırlar. Son dövrdə Sizin rəhbərliyiniz sayəsində rayonumuzda da çox işlər görülmüşdür. Klub, muzey, məscid, univermaq tikilib istifadəyə verilmişdir. Biz daşkəsənlilər başa düşürük ki, bu, Sizin təsdiqlədiyiniz regionların sosial-iqtisadi inkişafı proqramının nəticəsidir.
Hörmətli Prezident!
Biz Sizin xalq üçün gördüyünüz işləri çox bəyənirik. Az vaxt ərzində bu qədər iş yerlərinin açılması, bu qədər müəssisələrin, idman qurğularının tikilib istifadəyə verilməsi, yolların çəkilməsi, körpülərin salınması, ulu öndərimizin şah əsəri olan Bakı-Tbilisi-Ceyhan neft kəmərinin işə salınması məhz Sizin yorulmaz əməyinizin və xalqınıza olan məhəbbətin nəticəsidir. Bütün bunlar Sizin yaradıcı və qurucu Prezident olduğunuzu bir daha təsdiqləyir. Biz inanırıq ki, Siz xalqımızın ən ağrılı problemi olan Qarabağ məsələsini də uğurla həll edəcəksiniz. Respublikamızın gələcəyi ilə bağlı planlarınıza ürəkdən inanırıq. Bilirik ki, Siz verdiyiniz sözü həmişə işinizlə təsdiq edirsiniz.
Möhtərəm Prezident!
Biz daşkəsənlilər bu dağların övladlarıyıq. Bizim Sizə olan sevgi-məhəbbətimiz bu dağlar qədər böyükdür. Biz Sizi çox sevirik. Düzdür, Sizi respublikanın hər yerində sevirlər. Ancaq biz daşkəsənlilər Sizi hamıdan çox sevirik.
Cənab Prezident, daşkəsənlilər həmişə Sizə arxa olacaq və Sizi dəstəkləyəcəklər. Arzumuz odur ki, bir olan Allah Sizi həmişə qorusun, xalqımız üçün gördüyünüz nəhəng işlərdə Tanrı Sizə kömək olsun!
Azərbaycan Prezidenti İlham Əliyevə eşq olsun!
X X X
Prezident İlham Əliyev mərasimdə nitq söylədi.
X X X
Prezident İlham Əliyev sonra mərasim iştirakçıları ilə söhbət etdi, müəssisənin işçiləri, eləcə də yerli sakinlərlə xatirə şəkli çəkdirdi.
Dövlətimizin başçısı daha sonra bu yüksəklikdən filiz yataqlarını, kanat yollarını, Daşkəsəni, uzaqda görünən Gəncə şəhərini seyr etdi və mənzərəli yerlərdə xanımı Mehriban Əliyeva ilə birlikdə xatirə şəkli çəkdirdi.
Bölmənin digər xəbərləri
