Azərbaycan Prezidenti İlham Əliyev və xanımı Mehriban Əliyevanı burada böyük hörmət və ehtiramla, gül-çiçəklə qarşıladılar.

Dövlətimizin başçısına məlumat verildi ki, 12 mənzildən ibarət üçmərtəbəli binanın iki mərtəbəsi Nazirlər Kabinetinin, bir mərtəbəsi isə Heydər Əliyev Fondunun vəsaiti hesabına tikilmişdir. Birinci-ikinci mərtəbələrdəki 8 mənzil aidiyyəti üzrə paylanır. Üçüncü mərtəbədəki 4 mənzil isə internat məktəbində böyümüş gənclər ailə qurduqdan sonra onlara veriləcəkdir.

Prezident İlham Əliyev ayrı-ayrı mənzillərə baxaraq, burada yaradılan şəraitlə yaxından tanış oldu və görülən işləri yüksək qiymətləndirdi. Respublikamızın rəhbəri adından hər mənzilə televizor hədiyyə edildi.

Sonra dövlətimizin başçısı mənzillərin orderlərini sahiblərinə təqdim etdi.

Şəhid Mikayıl Mustafayevin atası Murtuzəli Mustafayev Prezidentə müraciət edərək, şəhid ailələrinə və Qarabağ müharibəsi əlillərinə göstərilən qayğıya, o cümlədən belə rahat mənzillər verilməsinə görə minnətdarlığını bildirdi.

Rayon Qarabağ müharibəsi əlilləri və şəhid ailələri ictimai birliyinin sədri Bəxtiyar İsmayılov da dövlətimizin başçısına təşəkkür edərək, gələcəkdə də belə binaların tikilməsinə ehtiyac olduğunu söylədi.

İLHAM ƏLİYEV: Burada nə qədər Qarabağ müharibəsi əlili var?

BƏXTİYAR İSMAYILOV: Daşkəsən rayonunda 38 nəfərdir.

İLHAM ƏLİYEV: Onların ev şəraiti yaxşı deyil?

BƏXTİYAR İSMAYILOV: Xeyr.

İLHAM ƏLİYEV: Yavaş-yavaş həll edərik. İndi bütün rayonlarda şəhid ailələri, Qarabağ əlilləri üçün yaşayış binaları tikilir və daha da çox tikiləcəkdir. Bizim iqtisadi imkanlarımız artır. İlk növbədə, biz ehtiyacı olan insanların həyat səviyyəsini yaxşılaşdırmalıyıq. Xüsusilə, Qarabağda vuruşan və sağlamlığını itirmiş insanların həyat səviyyəsini yaxşılaşdırmaq hər bir vəzifəli şəxsin borcu olmalıdır. O cümlədən şəhid ailələrinə qayğı. Düzdür, bu evlər, bu şərait həlak olmuş insanları qaytarmaz. Amma heç olmasa, sizin dərdinizi bir balaca yüngülləşdirir. Ona görə bu siyasət Azərbaycanda aparılır. Bütün rayonlarda bu siyasət davam edəcəkdir. Ona görə də siz arxayın olun, belə binalar çox tikiləcəkdir.

Sizi bir daha təbrik edirəm. Arzu edirəm ki, bu gözəl evdə xoşbəxt yaşayasınız. Siz çox böyük çətinliklər çəkmisiniz, əlil olmusunuz, doğmalarınızı itirmisiniz. Ona görə gərək bütün icra nümayəndələri sizə qayğı göstərsinlər.

İcra hakimiyyətinin başçısı da burada yaxşı işlər görür. Görürsünüz ki, Daşkəsəndə qısa müddətdə böyük dəyişikliklər olubdur.

MURTUZƏLİ MUSTAFAYEV: Cənab Prezident, hələ indiyədək Daşkəsən rayonuna belə icra nümayəndəsi gəlməmişdir. Göndərdiyiniz kadra görə çox sağ olun. Bütün sakinlər adından Sizə dərin minnətdarlığımızı bildiririk. Sizin göstərişləriniz uğurla icra edilir. Daşkəsən camaatının 85 faizi işsizlikdən qurtarıbdır. İndi normal şəraitdə yaşayırıq. Sizə çox minnətdarıq. Hazırda başqa rayonlardan gəlib Daşkəsəndə işləyirlər. Vaxtilə bizim camaat buradan Şəmkirə, Bakıya, başqa yerlərə çörək dalınca gedirdi. Bəli, Sizin sayənizdə çörək tapmışıq. Günümüz çox yaxşı keçir.

İLHAM ƏLİYEV: Düz deyirsiniz, bundan sonra buraya başqa rayonlardan işləməyə gələcəklər. İndi böyük kombinat işə başlayır. Burada minlərlə insan işləyəcəkdir. Zavodlar olacaq, infrastruktur yaradılır, yol çəkilir. Bilmirəm, siz təzə yolla getmisiniz, yoxsa yox, çox yüksək səviyyədədir.

MURTUZƏLİ MUSTAFAYEV: Bəli, getmişik. Cənab Prezident, ilk dəfədir Daşkəsən rayonuna bu cür yol çəkilibdir. Heç SSRİ-nin vaxtında da belə yol olmayıbdır.

İLHAM ƏLİYEV: Düzdür, heç vaxt olmayıbdır. Amma indi ən yüksək səviyyədədir. Ona görə də Daşkəsən rayonu irəliyə gedəcəkdir. Artıq burada gözəl işlər görülür, şəhər abadlaşır. İndi işıq, qaz problemi də həll olunur.

Elektrik enerjisi ilə təminat necədir?

MURTUZƏLİ MUSTAFAYEV: Yaxşıdır, problem yoxdur. Əvvəllər çətinlik olurdu, amma indi yoxdur.

İLHAM ƏLİYEV: İndi biz Azərbaycanda 6 elektrik stansiyası tikirik. Nə üçün? Ona görə ki, hər yerdə işıq olsun. Ən ucqar kənddə də, ən uzaqda yerləşən yerdə də işıq olmalıdır. Daşkəsən də belə yerlərdən biridir. Azərbaycanın başqa rayonlarından fərqli olaraq, ucqar rayondur. Özü də buraya yol ancaq Gəncədəndir. Ona görə prinsipcə belə rayonların, yəni əsas magistral yollardan kənarda yerləşən rayonların inkişafına daha da böyük diqqət göstərilməlidir. Çünki mərkəzdə yerləşən rayonlarda iş daha çoxdur, gediş-gəliş var, ticarət daha yaxşı gedir. Amma ucqar yerlərdə imkanlar o qədər də geniş deyildir. Ona görə ilk növbədə diqqət bu rayonlara göstərilməldir.

Biz Lerikə, Yardımlıya, Xınalığa, indi Daşkəsənə yol çəkdik. Nə üçün? İnsanlar rahat gedib-gəlsinlər, yaxşı yaşasınlar. Ona görə bu bizim planlarımızdır və siz də bunu görürsünüz ki, burada qısa müddətdə çox böyük dəyişikliklər olubdur. Bundan sonra da olacaq ki, insanlar yaxşı yaşasınlar.

TAHİR KƏRİMOV: Cənab Prezident, Sizin rayonların inkişafı, insanların yaxşı yaşaması üçün qarşıya qoyduğunuz hər bir tapşırığı bundan sonra da ləyaqətlə yerinə yetirməyə çalışacağıq.

BƏXTİYAR İSMAYILOV: Cənab Prezident, rayon rəhbərliyi tərəfindən Qarabağ müharibəsi əlilləri və şəhid ailələrinə qayğı göstərilir.

İLHAM ƏLİYEV: Hər bir vəzifəli şəxs xalqa xidmət etməlidir. Prezident kimi mən də öz borcumu bunda görürəm. Mən xalqa xidmət etmək üçün işləyirəm.

MURTUZƏLİ MUSTAFAYEV: Xalq Sizin arxanızdadır, Sizi dəstəkləyir, Sizə minnətdarıq. Bütün şəhid ailələri Sizin daxili və xarici siyasətinizi dəstəkləyir.

BƏXTİYAR İSMAYILOV: Cənab Prezident, Daşkəsən rayonu xoşunuza gəldimi?

İLHAM ƏLİYEV: Çox. Mən birinci dəfədir Daşkəsənə gəlirəm. Çox gözəl, səfalı məkandır. Dağlar, yollar, çaylar, - yolun kənarı ilə də çay axır, - çox gözəl mənzərədir. Şəhərin mərkəzi də çox müasirdir. Amma düzdür, köhnə şəkillərə baxanda mən bir az təəccübləndim və dedim ki, belə olmaz. Rayon son altı ay ərzində görkəmini tamamilə dəyişdi. Bütün binalar rənglənir, yeni binalar tikilir, təmir olunur, küçələr asfaltlanır, işıq dirəkləri qoyulur. Burada abadlıq var.

MURTUZƏLİ MUSTAFAYEV: Cənab Prezident, Daşkəsən sanki, Londondur. Qəribə səslənsə də, əvvəlki vəziyyətə baxdıqda, indi Londona bənzətmək olar. Bu, qısa müddətdə Sizin köməyinizlə olmuşdur.

İLHAM ƏLİYEV: Amma Londonda belə gözəl dağlar, belə təmiz hava yoxdur.

BƏXTİYAR İSMAYILOV: Cənab Prezident, Sizdən bir xahişimiz də var. Rayonumuzdan olan Qarabağ müharibəsi əlilləri uzun müddətdir avtomobil növbəsindədirlər. İndiyədək Daşkəsəndən bir nəfər də avtomobil almayıbdır.

İLHAM ƏLİYEV: Almayıb?

TAHİR KƏRİMOV: Cənab Prezident, əmək və əhalinin sosial müdafiəsi naziri ilə danışmışam.

İLHAM ƏLİYEV: Mənim adımdan deyin, tezliklə təşkil edib göndərsin.

BƏXTİYAR İSMAYILOV: Cənab Prezident, çox sağ olun.

X X X

Prezident İlham Əliyev yeni mənzillərin sahiblərini bir daha təbrik etdi.

X X X

Azərbaycan Prezidenti İlham Əliyev noyabrın 1-də Gədəbəy rayonuna gəlmişdir. Dövlətimizin başçısı əvvəlcə Heydər parkının və ulu öndərin abidəsinin açılışında iştirak etdi, rayon ictimaiyyətinin nümayəndələri qarşısında nitq söylədi.

Sonra Azərbaycan Beynəlxalq Mədən Əməliyyat Şirkətinin Gədəbəy yatağı məhsullarının geoloji sərgisinə, Gədəbəy İdman Kompleksinə baxdı, əsasən ruslar yaşayan Slavyanka kəndində rus icmasının nümayəndələri ilə görüşdü, burada Heydər Əliyev Fondunun təşəbbüsü ilə tikilən orta məktəb binasında inşaat işlərinin gedişi ilə tanış oldu.

X X X

Həmin gün Gədəbəydən Şəmkir rayonuna gələn Prezident İlham Əliyev ulu öndərin abidəsi önünə gül qoydu, Heydər Əliyev muzeyinin açılışında iştirak etdi.

Dövlətimizin başçısı sonra Şəmkir Olimpiya İdman Kompleksinin təməlqoyma mərasimində nitq söylədi, Şəmkir-Qazax avtomobil yolunun açılışı mərasimində iştirak etdi, akademik Zərifə xanım Əliyevanın adını daşıyan parka gələrək, görkəmli oftalmoloq alimin abidəsi önünə gül dəstəsi qoydu.

Prezident İlham Əliyev həmin gün Şəmkir quşçuluq fabriki, Heydər Əliyev Fondu tərəfindən əsaslı təmir olunmuş Füzuli qəsəbə orta məktəbi ilə də tanış oldu.

(Dövlətimizin başçısının Gədəbəy və Şəmkir rayonlarına səfəri barədə materiallar qəzetin növbəti nömrələrində dərc ediləcəkdir).