Bakı, 21 sentyabr, AZƏRTAC

Məlum olduğu kimi, Azərbaycan Ordusu 2020-ci ilin 44 günlük Vətən müharibəsində dünyaya nümunə olan bir şücaət sərgilədi. Həmin vaxt Azərbaycanın döyüşdə tətbiq etdiyi taktika uzun illər dünyanın hərbi mərkəzləri tərəfindən öyrəniləcək. Azərbaycan, həmçinin bu il sentyabrın 19-da Qarabağ bölgəsində həyata keçirdiyi lokal xarakterli antiterror tədbirləri ilə də dünyaya nümunə oldu.

Bunu AZƏRTAC-a açıqlamasında Milli Məclisin deputatı Vüqar İskəndərov deyib.

Azərbaycan tərəfinin antiterror tədbirləri zamanı yaşayış məntəqələrinə daxil olmadığını, ancaq hərbi hədəfləri vurduğunu söyləyən deputat əlavə edib: “Azərbaycan Silahlı Qüvvələri mülki obyektləri, mülki əhalini hədəfə almadı. Bu antiterror tədbirləri miqyasına görə çox nadir nümunələrdən biri oldu. Belə ki, belə tədbirlər zamanı mülki əhali arasında itki olmadı”.

Deputat əlavə edib ki, Azərbaycan Ordusu çox qısa müddətdə ərazidə kommunikasiyaları və yüksəklikləri nəzarətə götürdü. Ordumuz həqiqətən gələcəyin - XXI əsrin daha bir əməliyyat modelini ortaya qoydu. Dünya bir daha gördü ki, yüksək peşəkarlığa malik olan Azərbaycan Ordusu qarşısına qoyulan hədəflərə uğurla çatır. Bunun nəticəsində də strateji hədəflərə tam nail olunur. Bir sözlə, Prezident İlham Əliyevin sentyabrın 20-də xalqa müraciətində bəyan etdiyi kimi, Ordumuzun, bütün Silahlı Qüvvələrimizin peşəkarlığı, texniki imkanları bizə bu vəzifəni şərəflə yerinə yetirməyə şərait yaratdı və Azərbaycan əsgəri, zabiti bir daha həm yüksək peşəkarlıq, həm də yüksək mənəvi keyfiyyətlər göstərdi.