DİAQNOSTİKA-MÜALİCƏ MƏRKƏZİNİN HƏKİMİZÜMRÜD CƏFƏRLİNİN ÇIXIŞI
Biz səhiyyə işçiləri Sizi bu qədim Azərbaycan torpağında
salamlamaqdan, Sizinlə bir yerdə olmağımızdan qürur duyuruq. Ölkəmizdə səhiyyənin inkişafı ümummilli liderimizin adı ilə bağlıdır. Xalqımızın böyük oğlu daim səhiyyənin inkişafına çalışmış, bu sahəyə xüsusi qayğı göstərmişdir. Sizin rəhbərliyinizlə bu yol davam etdirilir. İnsanların sağlamlığının möhkəmləndirilməsi daim diqqət mərkəzindədir. Son illər Azərbaycanın müxtəlif bölgələrində yeni tibb ocaqlarının tikilməsi, müasir müalicə-diaqnostika mərkəzlərinin yaradılması, səhiyyə sisteminə ayrılan büdcə vəsaitlərinin ilbəil artırılması, səhiyyə müəssisələrinin müasir tibbi avadanlıqla, texnika ilə təchiz edilməsi, maddi-texniki bazasının möhkəmləndirilməsi əhalinin sağlamlığının qorunması işində əsaslı dönüş yaratmışdır. Səhiyyə müəssisələrinin daha səmərəli işləməsi, əhaliyə göstərilən tibbi xidmətin səviyyəsinin yüksəldilməsi məqsədi ilə köklü islahatlar aparılır, yeni struktur sahələri yaradılır. Ana və uşaqların, ahıl şəxslərin müalicəsi, ixtisaslı kadrların hazırlanması səhiyyədə mühüm istiqamətlərdən birinə çevrilmişdir. Bu tədbirlər muxtar respublikamızda da ardıcıl həyata keçirilir. Genişmiqyaslı quruculuq işlərinin nəticəsidir ki, təkcə 2006-cı ilin 11 ayı ərzində 11 həkim ambulatoriyası və feldşer-mama məntəqəsi istifadəyə verilmiş, Əziz Əliyev adına Mərkəzi uşaq xəstəxanasının, Naxçıvan Muxtar Respublikası Səhiyyə Nazirliyinin binaları yenidən qurulmuş, Kəngərli rayon mərkəzi xəstəxanasının yeni binası istifadəyə verilmiş, Duzdağ fizioterapiya xəstəxanasının şaxta hissəsində çarpayıların sayı 250-yə çatdırılmaqla yeni, geniş palata yaradılmışdır. Bütün səhiyyə müəssisələri yeni, müasir tibb avadanlığı və texnikası, inventarla təchiz edilmişdir. Səhiyyə sahəsində geniş quruculuq işləri bu gün də davam etdirilir. 100 çarpayılıq Şərur rayon mərkəzi xəstəxanası, 100 çarpayılıq respublika psixi xəstəliklər dispanserinin yeni binalarının tikintisi başa çatmaqdadır. Görülən işlərin fonunda Naxçıvan şəhərində açılışına toplaşdığımız müasir tipli Diaqnostika-Müalicə Mərkəzinin istifadəyə verilməsi xüsusi əhəmiyyət daşıyır.
Hörmətli Prezidentimiz, Sizin himayənizlə inşasına başlanılan bu obyekt naxçıvanlıların sağlamlığının qorunmasında çox mühüm rol oynayacaqdır. Ən müasir dünya standartlarına uyğun mərkəz Naxçıvanın hər bir tibb işçisinin, hər bir vətəndaşımızın qüruruna çevriləcəkdir. Bu mərkəzin istifadəyə verilməsi nəticəsində 350 yeni iş yeri açılır. Yeni işlə təmin olunanlardan biri də mənəm.
Tibb Universitetinin ikinci müalicə-profilaktika fakültəsini bitirmiş, 2003-cü ildən akademik Zərifə xanım Əliyeva adına Naxçıvan şəhər poliklinikasında işləmişəm. Türkiyə Respublikasının Kocaeli Universitetində kurs keçmişəm. Bu müasir tibb müəssisəsində işləmək bizi bir tərəfdən sevindirirsə, digər tərəfdən də, üzərimizə böyük məsuliyyət qoyur. Biz səhiyyə işçiləri bu yüksək qayğıya görə Sizə, dövlətimizin başçısına həmişə minnətdarıq. Bu qayğıya cavab olaraq, Sizə söz veririk ki, əhalinin sağlamlığı naminə bütün qüvvə və bacarığımızı səfərbər edəcək, Sizin etimadınıza layiq olmağa çalışacağıq.
Möhtərəm Prezident, Sizi qarşıdan gələn ad gününüz münasibətilə muxtar respublikanın səhiyyə işçiləri və kollektivləri adından, bütün insanlarımız adından səmimi qəlbdən təbrik edir və Sizə Allahdan uzun ömür və möhkəm cansağlığı arzulayırıq.
X X X
Prezident İlham Əliyev mərasimdə nitq söylədi.
X X X
Sonra Prezident İlham Əliyev mərkəzin rəmzi açılışını bildirən lenti kəsdi, Diaqnostika-Müalicə Mərkəzi ilə yaxından tanış oldu. Dövlətimizin başçısı təcili yardım, diaqnostika, kardiocərrahiyyə, şüa diaqnostikası, reanimasiya, cərrahiyyə, hemodializ şöbələrini, əməliyyat blokunu gəzdi, palatalara, laboratoriyaya, qan bankı otağına və həkim otaqlarına baxdı.
Diaqnostika-Müalicə Mərkəzinə xüsusi təcili yardım maşınları da verilmişdir. Prezident İlham Əliyev görülən işləri yüksək qiymətləndirərək, əsas məsələnin kadr hazırlığı ilə bağlı olduğunu, mərkəzin kadrlarla təminatının daimi olmasının vacibliyini vurğuladı, müvafiq tövsiyə və tapşırıqlarını verdi.
Bölmənin digər xəbərləri
