Dibçək güllərinə qulluq qaydası
Bakı, 2 noyabr, AZƏRTAC
Ev şəraitində bəslənilən dibçək güllərə qulluq səbir və zəhmət tələb edir. Dibçək güllərini əkməyin öz vaxtı var. Mütəxəssislər bildirirlər ki, otaq bitkilərini ilin bütün vaxtlarında yetişdirmək məsləhətdir.
AZƏRTAC xəbər verir ki, əkin üçün ən yaxşı vaxt mart və oktyabr ayları sayılır. Payızda əkilən güllər xüsusi diqqət və qulluq tələb edir. Payızda havanın tez-tez və gözlənilmədən dəyişməsi otaq güllərinin həyat funksiyalarının zəifləməsinə səbəb olur. Onlar qış istirahətinə hazırlaşdıqları vaxt güllərin yerini dəyişmək məsləhət deyil.
Qızılgül, ofokantus, azariya və sitruslar başqa bitkilərlə müqayisədə daha soyuq yerləri sevir. Ona görə də həmin bitkiləri yaza qədər temperaturu 3-6 dərəcə olan və ya otaqda ən sərin yerə qoymaq məsləhətdir. Onları tez-tez sulamaq da düzgün deyil. Mütəxəssislər həmin bitkilərin köklərinin qurumaması üçün az miqdarda suya ehtiyacı olduğunu bildirirlər. Bu qulluq yarpaqların erkən tökülməsinin də qarşısını alır.
Payız mövsümü bir çox otaq bitkiləri üçün qış yuxusuna keçid dövrü sayılır. Bir çox böyük bitkilər isə istirahət zamanı da qida maddələri tələb edir. Bu zaman kalium tərkibli gübrələrdən istifadə etmək məsləhətdir. Pəncərə qabağında düzəndə alçaq boylu bitkiləri şüşənin qabağına, hündürboyluları isə ikinci cərgəyə yerləşdirmək lazımdır. Belə düzüldükdə güllər işıq və havanı bərabər miqdarda ala bilirlər.
Bölmənin digər xəbərləri
