Direktor: Çap məhsullarının istehsalı zamanı uşaqların sağlamlığı, görmə təhlükəsizliyi nəzərə alınmalıdır
Bakı, 30 iyun, AZƏRTAC
“İnformasiya, sənədləşdirmə, nəşriyyat və kitabxana işi” standartlaşdırma üzrə Texniki Komitənin növbəti iclası keçirilib.
AMEA-dan AZƏRTAC-a bildirilib ki, iclasda “Elm” nəşriyyatının direktoru Səbuhi Qəhrəmanov gündəlikdəki məsələlər haqqında məlumat verib. Direktorun sözlərinə görə, ilin əvvəlində komitənin 2026-cı il üçün fəaliyyət planı və qəbul olunacaq standartlar müəyyənləşdirilib. O, hazırkı fəaliyyət planında müəyyən əlavə və dəyişikliklər edilməsinin zəruri olduğunu vurğulayıb.
Müzakirələrdən sonra komitənin cari il üçün fəaliyyət planına dəyişiklik edilməsi qərara alınıb.
Gündəlikdə yer alan növbəti məsələ “Uşaqlar və yetkinlik yaşına çatmayanlar üçün nəzərdə tutulmuş malların təhlükəsizliyinə dair texniki reqlament” layihəsinin nəşriyyat, kitab və jurnal məhsullarına dair təhlükəsizlik tələblərinin müzakirəsi və müvafiq standartlaşdırma işlərinin perspektivlərinin müəyyən edilməsi haqqında olub. S.Qəhrəmanov bildirib ki, xüsusilə uşaqlar və yetkinlik yaşına çatmayanlar üçün nəzərdə tutulan çap məhsulları hazırlanarkən sanitar-gigiyenik normalara əməl olunması vacibdir. Bu reqlamentdə yer alan müddəalara əsasən, kitab, jurnal və digər çap məhsullarının istehsalı zamanı uşaqların sağlamlığı, görmə təhlükəsizliyi mütləq nəzərə alınmalıdır. Burada şrift ölçüsü, mətnin oxunaqlılığı, istifadə olunan kağızın keyfiyyəti, nəşrin bioloji və kimyəvi təhlükəsizliyi diqqət yetirilməli olan mühüm məsələlərdir. Bu baxımdan müzakirəyə çıxarılan reqlamentin ölkə üzrə icrasına dəstək olmaq məqsədilə müvafiq standartların qəbulu məqsədəuyğun hesab olunur.
Növbəti məsələ “Beynəlxalq muzey statistikası” standartı ilə bağlı olub. Komitənin məsul katibi sənətşünaslıq üzrə fəlsəfə doktoru Nəzmin Cəfərova bildirib ki, bu standart muzeylər üçün statistik məlumatların toplanması və təqdim olunması qaydalarını müəyyən edir, muzeylərin ziyarətçilərə təklif etdiyi bütün növ resurs və xidmətlərin hesablanması üçün tərif və prosedurları özündə birləşdirir. Məsul katib dünyada fərqli vəzifələri və məqsədləri olan müxtəlif növ muzeylərin fəaliyyət göstərdiyini, bu qurumların özünəməxsus keyfiyyətlərə (struktur, maliyyələşmə, idarəçilik və s.) malik olduğunu, buna görə də sənəddə hər muzeyə fərdi yanaşmağın zəruriliyini vurğulayıb.
Gündəlikdə yer alan növbəti məsələ “Kitabxana fəaliyyətinin standartlaşdırılması sahəsində Türkiyə təcrübəsi”nə dair olub. Kitabxana statistikası və fəaliyyət göstəriciləri üzrə işçi qrupunun rəhbəri Daşqın Məhəmmədli Türkiyədə kitabxana fəaliyyətinin tənzimlənməsi istiqamətində formalaşdırılmış normativ-hüquqi baza, beynəlxalq standartların tətbiqi, xidmət keyfiyyətinin qiymətləndirilməsi, kitabxana proseslərinin idarə olunması, rəqəmsal transformasiya və peşəkar fəaliyyətin standartlaşdırılması sahəsində həyata keçirilən islahatlar və s. haqqında danışıb.
Daha sonra cari məsələlər müzakirə olunub, müvafiq qərarlar qəbul edilib.
Bölmənin digər xəbərləri
