REGİONLAR
Dörd rayonda 130 qadına biznes qurmaqda dəstək veriləcək
Qusar, 26 aprel, Elxan Yusifli, AZƏRTAC
Aprelin 26-da Ailə, Qadın və Uşaq Problemləri üzrə Dövlət Komitəsinin (AQUPDK) sədr müavini Sədaqət Qəhrəmanova, İsveçrənin Azərbaycandakı səfiri Muriel Peneveyre, İsveçrə Əməkdaşlıq ofisinin regional direktorunun müavini Alberto Hernandez və BMT-nin İnkişaf Proqramının (BMTİP) rezident nümayəndəsinin müavini Çaru Bista Qusara səfər ediblər.
AZƏRTAC-ın bölgə müxbiri xəbər verir ki, səfərin əsas məqsədi Qusarda fəaliyyət göstərən Qadın Resurs Mərkəzinin (QRM) üzvləri ilə görüşmək və son illərdə yerli qadınlar tərəfindən qurulan kiçik bizneslərlə tanışlıqdan ibarət olub.
Qonaqlar əvvəlcə Qusar Rayon İcra Hakimiyyətinin başçısının müavini Elman Mustafayevlə görüşüb, uğurlu əməkdaşlığın nəticələrini və gələcək planları müzakirə ediblər.
Sonra Qusar rayon Heydər Əliyev Mərkəzində fəaliyyət göstərən Qadın Resurs Mərkəzinin aktiv üzvləri ilə görüş keçirilib.
Bildirilib ki, 2018-ci ildən başlayaraq Ailə, Qadın və Uşaq Problemləri üzrə Dövlət Komitəsi ilə əməkdaşlıq çərçivəsində BMTİP İsveçrə İnkişaf və Əməkdaşlıq Agentliyi, həmçinin Avstriya İnkişaf Agentliyinin maliyyə dəstəyi ilə Qusar, Sabirabad və Bakının Xəzər rayonlarında “Cənubi Qafqazda Qadınların İqtisadi Səlahiyyətlərinin Artırılması” layihəsi həyata keçirilir. Layihə əsasında iki Qadın Resurs Mərkəzi qurulub və bir Mərkəzə dəstək göstərilib. Bununla yanaşı, 115 qadın öz biznesini qurub ki, onların da 30 nəfəri Qusardadır.
Layihənin ikinci mərhələsi 2022-ci ilin yanvar ayında başlayıb. Bu mərhələdə layihə çərçivəsində fəaliyyət göstərən Qadın Resurs mərkəzlərinə dəstək davam edəcək və daha bir mərkəz isə münaqişədən zərərçəkmiş Füzuli rayonunda açılacaq. Layihə çərçivəsində 4 rayonda 130 qadına biznes qurmaqda dəstək veriləcək və 350 qadın məşğulluq imkanlarından yararlanacaq.
Görüş zamanı mərkəzdə həyata keçirilən layihə çərçivəsində təşkil olunan təlimləri uğurla başa vuran qadınlara sertifikatlar təqdim edilib.
Qonaqlar 20-dən çox layihə iştirakçısının öz əl işlərini və məhsullarını təqdim etdiyi sərgiyə baxış keçirib, rayonun Xuray və Çiləgir kəndlərində kiçik biznesini quran yerli qadın sahibkarların fəaliyyəti ilə də tanış olublar.