DÖVLƏT BÜDCƏSİ HESABINA 4 MİLYARD MANATLIQ ZƏRƏR ÖDƏNİLMİŞDİR
Daşqınların vurduğu ziyanın aradan qaldırılması üçün Azərbaycana Yaponiya hökuməti tərəfindən 80 min dollar yardım göstəriləcəkdir. Fövqəladə Hallar üzrə Dövlət Komissiyasından AZƏRTAC-ın müxbirinə bildirmişlər ki, ABŞ səfirliyi tərəfindən artıq 25 min dollar ayrılmış, əhalinin daşqınlardan ciddi zərər çəkənlərinin böyük hissəsinə kompensasiyalar verilmişdir. Bu günə kimi dövlət büdcəsi hesabına 4 milyard manatlıq zərər ödənilmiş, 164 ev təsərrüfatı vəsait almışdır. Dəyən zərərin dərəcəsindən asılı olaraq, hər adama 100 min manatdan 5 milyon manatadək konpensasiya verilir. Azərbaycan hökuməti daşqınların və sellərin respublikaya vurduğu zərərin aradan qaldırılması və həmçinin yeni təbii fəlakətlərin qarşısının alınması üçün Avropa Komissiyasına, Dünya Bankına, Asiya İnkişaf Bankına, həmçinin ABŞ, Norveç, Yaponiya və ərəb ölkələrinin hökumətlərinə müraciət etmişdir.
