Dövlət Komitəsində Şuşanın işğalının 28-ci ildönümü ilə bağlı videokonfrans keçirilib
Bakı, 8 may, AZƏRTAC
Azərbaycanın mədəniyyət beşiyi olan qədim Şuşa şəhərinin Ermənistan silahlı birləşmələri tərəfindən işğal edilməsinin 28-ci ili tamam olur. Bununla əlaqədar Diasporla İş üzrə Dövlət Komitəsinin təşəbbüsü ilə Türkiyədə fəaliyyət göstərən Azərbaycan diaspor təşkilatlarının rəhbərləri və təmsilçilərinin iştirakı ilə videokonfrans keçirilib.
AZƏRTAC xəbər verir ki, Dövlət Komitəsinin nümayəndələri çıxışlarında Ermənistan-Azərbaycan Dağlıq Qarabağ münaqişəsi haqqında həqiqətlərin qlobal müstəvidə yayılması istiqamətində səyləri gücləndirməyin diasporla iş sahəsində dövlət siyasətinin prioritetini təşkil etdiyini bildiriblər. Qeyd olunub ki, münaqişənin danışıqlar yolu ilə Azərbaycanın ərazi bütövlüyü çərçivəsində ədalətli həllinə nail olmaq üçün digər mexanizmlərlə yanaşı, diaspor amili də mühüm əhəmiyyət kəsb edir.
Müzakirə zamanı diaspor təşkilatlarının təşəbbüsü ilə 2020-ci il fevralın 22-də Almaniyanın paytaxtı Berlində Ümumavropa Qarabağ mitinqinin keçirilməsinin, qəbul olunmuş bəyanatların nüfuzlu beynəlxalq təşkilatlara, səfirliklərə, Avropa ölkələrinin parlamentlərinə və hökumətlərinə göndərilməsinin əhəmiyyəti vurğulanıb.
Konfrans zamanı Türkiyədə fəaliyyət göstərən diaspor təşkilatlarının və vətəndaş institutlarının Ermənistanın işğalçı siyasəti, ermənilərin xalqımıza qarşı törətdikləri soyqırımı və terror aktlarının ağır nəticələrinin dünya ictimaiyyətinə çatdırılması istiqamətində həyata keçirdikləri işlər nəzərə çatdırılıb. Konfransda Ermənistan-Azərbaycan Dağlıq Qarabağ münaqişəsi barədə həqiqətlərin dünya ictimaiyyətinə çatdırılması istiqamətində xaricdə yaşayan soydaşlarımızın fəaliyyəti barədə müzakirələr aparılıb və bu sahədə daha mühüm addımların atılmasının vacib olduğu vurğulanıb.
Videokonfrans iştirakçıları koronavirus pandemiyası dövründə Türkiyədə yaşayan soydaşlarımızın həmrəyliyi barədə də fikir mübadiləsi aparıb və bu həmrəyliyi yüksək qiymətləndiriblər.
Dispor təşkilatlarının təmsilçiləri göstərilən diqqət və qayğıya görə Azərbaycan dövlətinə və hökumətinə, eləcə də Diasporla İş üzrə Dövlət Komitəsinə xüsusi minnətdarlıqlarını bildiriblər.
Bölmənin digər xəbərləri
