Dövlət Məşğulluq Agentliyi Avropa Sosial Şəbəkəsinə üzv qəbul olunub
Bakı, 21 fevral, AZƏRTAC
Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyi sosial xidmətlər sahəsində mötəbər beynəlxalq təşkilatlardan olan, ümumilikdə 160-dan çox üzvü özündə birləşdirən Avropa Sosial Şəbəkəsinə üzv qəbul olunub.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, son illər aparılan sosial islahatların tərkib hissəsi kimi, agentliyin fəaliyyət sahələrində innovativ həllərin geniş tətbiqi, məşğulluq xidmətlərinin rəqəmsallaşdırılması, çevik və şəffaf təşkili təmin olunub. Bu xidmətlərə əlçatanlığın və aktiv məşğulluq tədbirlərinin effektivliyinin, əhatə dairəsinin, əmək bazarında rolunun artırılması sahəsində önəmli addımlar atılıb. Həmin uğurlar beynəlxalq təşkilatlar tərəfindən də maraqla qarşılanır.
Avropa Sosial Şəbəkəsinə üzvlük agentliyə təşkilatın tədbirlərində, həmin şəbəkə üzərindən Avropanın və dünyanın məşğulluq sahəsində qabaqcıl təcrübələrinin mübadiləsi prosesində iştirak, yeni tərəfdaşlarla əməkdaşlıq imkanları qazandırır.
Həmçinin məşğulluq sahəsində dünyanın mütərəqqi təcrübələrinin ölkəmizdə tətbiqinə şərait yaradacaq, həmin təcrübələrin tətbiqi Avropanın peşəkar ekspertləri tərəfindən analiz ediləcək, yeni proseslər üçün təklif və tövsiyələr veriləcək.
Bölmənin digər xəbərləri
