Dövlət Miqrasiya Xidməti “Peşəkar müzakirələr”ə başlayır
Bakı, 20 aprel, AZƏRTAC
Miqrasiya üzrə Regional Təlim Mərkəzi çərçivəsində peşəkar mühitdə fikir və təcrübə mübadiləsinə şərait yaratmaq məqsədilə Dövlət Miqrasiya Xidməti (DMX) tərəfindən “Peşəkar müzakirələr” adlı silsilə tədbirlərin keçirilməsi nəzərdə tutulub.
DMX-nin mətbuat mərkəzindən AZƏRTAC-a bildirilib ki, müzakirələrin əsas məqsədi ölkəmizdə yaşayan və müxtəlif sahələrdə fəaliyyət göstərən əcnəbi mütəxəssislərin öz təcrübələrini yerli mütəxəssislərlə bölüşməsinə, onlar arasında qarşılıqlı faydalı təcrübə və fikir mübadiləsinin həyata keçirilməsinə, əlaqələrinin gücləndirilməsinə imkan yaradan, eləcə də ölkədə peşəkar və akademik müzakirə prosesini təşviq edən platforma rolunu oynamaqdır.
Müzakirələr müxtəlif mövzuları əhatə etməklə yanaşı, şəxsi və peşəkar bacarıqlarının gücləndirilməsinə də şərait yaradacaq.
İlk müzakirə tədbiri DMX-nin rəisi Vüsal Hüseynovun iştirakı ilə “Azərbaycanda miqrasiya idarəçiliyi” mövzusuna həsr olunacaq. Müzakirələrin miqrasiya sahəsində fəaliyyət göstərən mütəxəssislər, bu sahə ilə peşəkar məşğul olan şəxslər, sahəyə maraq göstərən tələbələr və elmi dairələrin nümayəndələri ilə aparılması nəzərdə tutulub.
Fəal, konstruktiv və məhsuldar müzakirələri təşviq etmək məqsədilə tədbirlərdə iştirak seçim əsasında aparılır.
Qeydiyyat mayın 5-dək aparılır.
Bölmənin digər xəbərləri
