Dövlət Sərhəd Xidmətinin Sahil Mühafizəsinin yaradılmasının 14-cü ildönümü qeyd edilib VİDEO
Bakı, 19 fevral, AZƏRTAC
Xəzər dənizində Azərbaycan Respublikasının dövlət sərhədinin mühafizəsi üzrə xidməti-döyüş fəaliyyətinə başlanılmasının 26-cı və Dövlət Sərhəd Xidmətinin (DSX) Sahil Mühafizəsinin yaradılmasının 14-cü ildönümləri münasibətilə tədbir keçirilib.
DSX-nin mətbuat mərkəzindən AZƏRTAC-a bildiriblər ki, tədbirdə Dövlət Sərhəd Xidmətinin rəisi, general-polkovnik Elçin Quliyev iştirak edib.
Dövlət himninin səsləndirilməsi ilə başlayan tədbirdə çıxış edən Dövlət Sərhəd Xidmətinin Sahil Mühafizəsinin rəisi, general-leytenant Əfqan Nağıyev dənizçi sərhədçilərin Xəzər dənizində dövlət sərhədinin mühafizəsi üzrə xidməti-döyüş fəaliyyətinə başlanılmasının 26-cı və DSX-nin Sahil Mühafizəsinin yaradılmasının 14-cü ildönümünü xoş ovqat hissi, yüksək əhval-ruhiyyə, xidmətdə qazanılmış uğurlar ilə qeyd etdiklərini bildirib.
Məruzəçi DSX Sahil Mühafizəsinin fəaliyyət göstərdiyi müddətdə dəniz sərhədlərimizin mühafizəsi sahəsində əldə etdiyi yüksək nailiyyətlər haqqında ətraflı məlumat verib.
Tədbirdə çıxış edən Dövlət Sərhəd Xidmətinin rəisi, general-polkovnik Elçin Quliyev dənizçi sərhədçiləri təbrik edərək Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin 2005-ci il 18 fevral tarixli Sərəncamı ilə Dövlət Sərhəd Xidmətinin Sahil Mühafizəsinin yaradılması və 2008-ci il noyabrın 8-də Ali Baş Komandan tərəfindən regionumuzda bənzəri olmayan yeni bazanın istifadəyə verilməsi ilə ölkəmizin dəniz sərhədlərinin mühafizəsinin yeni mərhələyə qaldırıldığını bildirib.
Bildirilib ki, müasir müstəqil Azərbaycan dövlətinin memarı və qurucusu ulu öndər Heydər Əliyevin müəyyənləşdirdiyi milli sərhəd strategiyasını uğurla davam etdirən Prezident, Silahlı Qüvvələrin Ali Baş Komandanı İlham Əliyevin 2013-cü il 11 sentyabr tarixli Sərəncamı ilə təsdiq olunmuş “Azərbaycan Respublikasının dəniz təhlükəsizliyi strategiyası”nın icrası üzrə yaradılmış DSX Sahil Mühafizəsinin gəmi inşası və təmiri mərkəzində inşa edilmiş “Tufan” və “Şahdağ” tipli 12 sərhəd gözətçi gəmisinə baxış məqsədilə dövlətimizin başçısının səkkiz dəfə Sahil Mühafizəsinin bazasında olması dəniz sərhədlərinin mühafizəsi məsələlərinə verilən xüsusi önəmin, bu sahəyə göstərilən ali diqqətin konkret təzahürləridir. Bu gəmilərin döyüş sıralarına qatılması sayəsində sərhəd sularında dövlət maraqlarımızın qorunması imkanları xeyli genişlənib, dəniz sərhədlərimizin etibarlı mühafizəsinin təşkilində yüksək nəticələr əldə olunub.
Vurğulanıb ki, 2018-ci il avqustun 12-də Xəzəryanı ölkələrin dövlət başçılarının V Zirvə toplantısında mühüm əhəmiyyət kəsb edən “Xəzər dənizinin hüquqi statusu haqqında Konvensiya”nın imzalanması dəniz sərhədlərimizin mühafizəsi üzrə xidməti fəaliyyətin yeni müstəvidə təşkil olunmasına şərait yaradıb.
Dövlət Sərhəd Xidmətinin rəisi, general-polkovnik Elçin Quliyev Heydər Əliyev ideyalarına sadiq əsgərlər olan Azərbaycan sərhədçilərinin Sərhəd Mühafizəsinin 100-cü ildönümünü xidməti-döyüş fəaliyyətlərində qazanılmış yüksək nailiyyətlərlə qarşılayacaqlarına, Prezident, Silahlı Qüvvələrin Ali Baş Komandanı İlham Əliyevin etimadını yeni nailiyyətlərlə doğruldacaqlarına əminliyini bildirib.
Sonra xidməti-döyüş fəaliyyətində yüksək nəticələr əldə etmiş bir qrup hərbi qulluqçu təltif olunub.
Tədbir iştirakçıları Dövlət Sərhəd Xidmətinin nümunəvi hərbi orkestrinin və incəsənət ustalarının ifasında maraqlı konsert proqramına tamaşa ediblər.
Bölmənin digər xəbərləri
