ELM VƏ TƏHSİL
“Dövlət və bələdiyyə idarəçiliyinin müasir problemləri” adlı dərs vəsaiti nəşr edilib
![“Dövlət və bələdiyyə idarəçiliyinin müasir problemləri” adlı dərs vəsaiti nəşr edilib](/files/2022/3/1200x630/16655740081237528066_1200x630.jpg)
Bakı, 12 oktyabr, AZƏRTAC
Azərbaycan Respublikası öz müstəqilliyinin üçüncü on illiyinə yenicə daxil olub. Bu, tarixi baxımdan çox qısa bir vaxt olmasına baxmayaraq, iqtisadi, sosial, humanitar və hərbi təhlükəsizlik sahələrində çox böyük uğurlar əldə edilib. Bunların ən əsası Azərbaycan Respublikasının Prezidenti, Ali Baş Komandan İlham Əliyevin rəhbərliyi ilə keçirilən 44 günlük Vətən müharibəsidir. Bunun nəticəsində Ermənistan tərəfindən ölkənin 28 illik işğalına son qoyuldu, Azərbaycan Respublikasının beynəlxalq səviyyədə tanınan ərazi bütövlüyü bərpa edildi. Bununla BMT Təhlükəsizlik Şurasının ölkənin ərazisinin işğaldan azad edilməsi barəsində 4 qətnaməsi Azərbaycan Respublikası tərəfindən yerinə yetirildi. Azərbaycanın hərbi Qələbəsinin əsasında ölkənin düşünülmüş iqtisadi, sosial və humanitar sahələrinin inkişaf strategiyası durur. Bu strategiyanın həyata keçirilməsi nəticəsində ölkəmiz davamlı inkişafın və inklüziv cəmiyyətin formalaşmasının idarəedilməsində dünya liderləri sırasındadır.
AZƏRTAC xəbər verir ki, bu sözləri Azərbaycan Respublikasının Prezidenti yanında Dövlət İdarəçilik Akademiyası Siyasi idarəetmə fakültəsinin dekanı, siyasi elmlər üzrə fəlsəfə doktoru, dosent Murtəza Həsənov deyib.
O qeyd edib ki, beynəlxalq təşkilatların hesabatlarına görə inklüziv inkişaf indeksinə görə Azərbaycan Respublikası dünyada 25-ci yerdədir və bu ölkənin iqtisadi imkanlarından əhəmiyyətli dərəcədə yüksəkdir. Az vəsait hesabına daha yüksək nəticələrin əldə edilməsi yalnız idarəetmənin yüksək səviyyədə həyata keçirilməsi şəraitində mümkündür. İdarəetmə sahəsində kadr potensialının hazırlanmasına dəstək olmaq məqsədilə “Dövlət və bələdiyyə idarəçiliyinin müasir problemləri” adlı dərs vəsaiti nəşr edilib. Dərs vəsaitində idarəetmənin müasir aspektləri, inzibati imkanları və onların dövlətin siyasət alətlərinin öz məqsədlərinə çatmasına necə imkan verildiyi təqdim edilir.
Murtəza Həsənovun sözlərinə görə, dərs vəsaitində müasir dövrdə dövlət idarəçiliyinin inkişaf perspektivlərinin dərk edilməsinə əsas yanaşmalar və onun xüsusiyyətləri, aparılan islahatlar təsvir edilib. “Dövlət və bələdiyyə idarəetməsi” termininin əsas-mahiyyət xarakteristikası, dövlətin regional iqtisadi siyasəti, yerli və xarici tədqiqatçıların dövlət və bələdiyyə idarəçiliyinə baxışları nəzərdən keçirilir. Müəlliflər məlumat şəffaflığı, iştirakçılıq, idarəetmə və səmərəlilik kimi fəaliyyətlərin transformasiyası yolu ilə dövlət və bələdiyyə səviyyələrində idarəetmə sistemini şərh edirlər. Dərs vəsaitində şəhər idarəçiliyinin sosial fenomen kimi düşünülməsinə müxtəlif yanaşmaların müqayisəli təhlili aparılıb. Dövlət və bələdiyyə idarəetməsinin iqtisadi əsasları verilib.
Dərs vəsaiti “İqtisadiyyat və İdarəetmə” ixtisasında tədris aparan təhsil müəssisələri, bu istiqamət üzrə təhsil alan tələbələr, magistrlər, tədqiqat aparan tədqiqatçılar, dövlət və bələdiyyə sahəsində olan mütəxəssislər üçün nəzərdə tutulub.