Bakı, 27 dekabr (AZƏRTAC). Dini Qurumlarla İş üzrə Dövlət Komitəsinin (DQİDK) nəşri olan “Dövlət və din” ictimai fikir toplusunun noyabr-dekabr nömrəsi çapdan çıxmışdır.

DQİDK-dən AZƏRTAC-a bildirmişlər ki, jurnal dövlətimizin başçısının Qurban bayramı münasibətilə Azərbaycan xalqına təbriki ilə açılır. “Rəsmi guşə” rubrikası ilə hazırlanan bölmədə Azərbaycan Prezidentinin Türkiyənin diyanət işləri başqanı Mehmet Görmezin başçılıq etdiyi nümayəndə heyətini qəbul etməsi, Qəbələ şəhər məscidinin tikinti işləri ilə tanış olması, DQİDK-in sədri Hidayət Orucovun Mehmet Görməzlə görüşü və “Azərbaycanda heç vaxt islamafobiya olmayıb və ola da bilməz” başlıqlı bəyanat öz əksini tapmışdır.

Bu nömrədə Qafqaz Müsəlmanları İdarəsinin sədri şeyxülislam Allahşükür Paşazadənin Qurban bayramı münasibətilə dindaşlarımıza təbriki, Bakı Dağ Yəhudiləri Dini İcması üzvlərinin Rusiyanın “Vesti FM” radiostansiyasında Azərbaycan xalqının ünvanına səsləndirilən fikirlərdən hiddətləndiklərini bildirən etiraz da dərc olunmuşdur.

Oxucular “Həyatımız. Dinimiz” rubrikasında DQİDK-in sədri Hidayət Orucovun milli mənəvi dəyərlərimizdə yad halların artması, xeyir-şər məclislərimizdə israfçılığın geniş vüsət alması problemlərinə həsr olunmuş “Sevinc və kədər - hara qədər?” məqaləsi ilə tanış ola bilərlər.

Toplunun ənənəvi “Cəmiyyət və din” rubrikasında Söhrab Məhərrəmovun “Sekulyarlaşma nədir?”, Ruşan Ruşanzadənin “Siyasi maraq və siyasi əxlaq hüquqi dövlət və vətəndaş cəmiyyəti kontekstində”, Əsədulla Qurbanovun “Dinşünaslıq, islamşünaslıq və siyasətşünaslığın bəzi aktual məsələləri”, Fəxriyyə Məmmədzadənin “Mədəniyyətlərarası dialoqda dini və etik dəyərlər”, Aydın Əlizadənin “Əski və çağdaş zamanda söz çəkişmələri”, Vüqar Əliyevin “Vatikan və yeni informasiya texnologiyaları” məqalələri yer almışdır.

“İslam həqiqətləri” guşəsinə daxil edilmiş Şuca Cavanpərəstin “Quran ayələri və rəvayətlər baxımından düşüncə”, Rəşadət Əhmədovun “Həzrət Məhəmmədin əlilləri işlə təmin etmə baxışları” başlıqlı yazılar diqqəti cəlb edir.

İctimai fikir toplusunun maraqlı rubrikalarından olan “Tarixə pəncərə” bölməsində dərc olunmuş Həsənağa Məmmədlinin “Reliqioznoye soznaniye: predıstoriya rannix reliqioznıx verovaniy” və Namiq Musalının “Bektaşi təriqətinin Şah İsmayıl Xətai ilə gizli təmaslarına dair” məqalələri oxucular tərəfindən maraqla qarşılana bilər.

Aygün Məmmədovanın “Bərdə zərbxanasında kəsilmiş VI-IX əsr sikkələri” və Bədircahan Əmrullahqızının “Ağdam ərazisində aşkarlanmış yeni arxeoloji tapıntılara dair” sərlövhəli məqalələri jurnalın “Abidələr” guşəsində yer almışdır.

İbrahim Quliyevin “Əllamə Məhəmməd Bağir Məclisinin “Biharül-ənvar” əsərində xristian dininin mənşəyi və mahiyyəti” məqaləsi isə toplunun yeni rubrikası olan “Etüd” bölməsinə daxil edilmişdir.

“Publisistika” rubrikası jurnalın oxunaqlı bölmələrindən birinə çevrilmişdir. Son nömrədə oxucular Nəriman Qasımoğlunun “Eko-ilahiyyata giriş, yaxud iman eksperimentləri məni bu mövzuya necə gətirdi” və Xanəmir Telmanoğlunun “Bayatı-Şiraz” başlıqlı elmi-publisistik yazıları ilə tanış olacaqlar.

“Sirlər Xəzinəsi” adlı rubrikada arxeologiya, tarix, ədəbiyyat, din və astronomiyaya dair maraqlı qısa xəbərlər yer almışdır.

Jurnalın bu nömrəsində “Məhəmməd. İlk mənbələr əsasında onun həyatı” adlı monoqrafiyanın ana dilimizə tərcüməsinin davamı da dərc edilmişdir.