DÜNYA ÇEMPİONATININ BAKIDA KEÇİRİLMƏSİ ÜÇÜN FİFA-YA MÜRACİƏT OLUNACAQDIR
AZƏRTAC xəbər verir ki, AFFA çimərlik futbolu üzrə 2011-ci il dünya çempionatının Bakıda keçirilməsi üçün FİFA-ya müraciət edəcəkdir.
Bu barədə AFFA-nın vitse-prezidenti Elşad Nəsirov qurumun rəsmi saytına müsahibəsində bildirmişdir.
E.Nəsirov Azərbaycan yığmasının Bakıda başa çatmış Avropa Kuboku turnirində üçüncü yeri tutmasını yüksək qiymətləndirmişdir.
AFFA-nın vitse-prezidenti demişdir ki, İngiltərə, Norveç və İtaliya kimi güclü yığmaları geridə qoyaraq belə bir nəticəni qazanmaq yüksək göstəricidir. Adlarını sadaladığım millilər böyük təcrübəyə malikdirlər. Mən deməzdim ki, biz çimərlik futbolunu peşəkar səviyyədə oynayırıq. Qısa zaman ərzində bu mümkün deyil. Amma görülən işlər, inkişaf göz qabağındadır. Artıq yaxın vaxtlarda çalışqan futbolçularımızın və güclü baş məşqçimizin sayəsində daha ciddi uğurların qazanılacağına böyük ümid bəsləyirik.
E.Nəsirov yaxın vaxtlarda Buzovnada, Novxanıda, Şüvəlanda yeni arenaların inşası üçün layihələrin hazırlanacağını söyləmişdir.
Bölmənin digər xəbərləri
