Dünyanın bir sıra dövlətlərinin parlamentləri Xocalı faciəsini soyqırımı kimi tanımışdır
Beyləqan, 26 fevral (AZƏRTAC, Tahir Ağaməmmədov). Xocalı faciəsinin 22-ci ildönümü Beyləqanda silsilə tədbirlərlə qeyd edilmişdir.
AZƏRTAC xəbər verir ki, fevralın 26-də Beyləqanın Dövlət Bayrağı meydanında faciənin ildönümünə həsr olunmuş ümumrayon anma mərasimi keçirilmiş, erməni hərbi birləşmələrinin xalqımıza qarşı törətdikləri soyqırımının dəhşətlərini əks etdirən foto və kitab sərgisi nümayiş olunmuşdur.
Tədbirdə çıxış edənlər Azərbaycan xalqının qan yaddaşı olan Xocalı faciəsindən, erməni vəhşiliklərindən danışmış, günahsız uşaqlara, qadınlara, qocalara qarşı törədilmiş bu qırğını təkcə Azərbaycan xalqına qarşı deyil, ümumilikdə insanlıq əleyhinə yönəlmiş soyqırımı kimi qiymətləndirmişlər.
Çıxışlarda Prezident İlham Əliyevin Xocalı faciəsi barədə həqiqətlərin dünya ictimaiyyətinə çatdırılması istiqamətində məqsədyönlü fəaliyyəti, Heydər Əliyev Fondunun vitse-prezidenti Leyla Əliyevanın irəli sürdüyü “Xocalıya ədalət!” beynəlxalq təbliğat və məlumatlandırma kampaniyası çərçivəsində görülən işlər yüksək qiymətləndirilmişdir. Diqqətə çatdırılmışdır ki, həyata keçirilən böyük işlər sayəsində dünyanın bir sıra ölkələrinin parlamentləri Xocalı faciəsini soyqırımı kimi tanımışdır.
Tədbirdə Xocalı soyqırımını əks etdirən ədəbi-bədii kompozisiya təqdim olunmuşdur.
Bölmənin digər xəbərləri
