Əcnəbi turistlər Çində 73 milyard dollar xərcləyiblər
Pekin, 15 fevral, AZƏRTAC
Ötən il əcnəbilər Çinə 30,54 milyon turist səfəri ediblər ki, bu da 2017-ci ilin göstəricisi ilə müqayisədə 4,7 faiz çoxdur.
AZƏRTAC Çinin Mədəniyyət və Turizm Nazirliyinə istinadla xəbər verir ki, ötən il ən azı bir gecə Çində qalan əcnəbilərin sayı 23,64 milyon nəfərə çatıb. Əcnəbi turistlər Çində ümumilikdə 73,1 milyard ABŞ dolları xərcləyiblər. Çini ən çox Cənubi Koreya, Yaponiya, ABŞ, Malayziya və Sinqapurdan olan turistlər ziyarət ediblər.
Qeyd edək ki, Çin əcnəbi səyahətçilərə 24 saatlıq vizasız tranzit keçidi imkanı verir. Bundan başqa, 53 ölkənin vətəndaşı 6 sutka ərzində Pekin və Şanxay da daxil olmaqla bir neçə şəhərdə vizasız tranzit qalma imkanından yararlana bilirlər. Çin 20 ölkədən olan turistlərə vizasız 15 gün Xaynan adasında qalmaq hüququ verir.
Ötən il Çinin turizm sektorunda dövriyyə əvvəlki illə müqayisədə 10,5 faiz artaraq 856 milyard dollara çatıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
