Əfqanıstan ilə Çin arasında müntəzəm aviareyslər bərpa edilib
Pekin, 24 may, AZƏRTAC
Əfqanıstanın milli aviadaşıyıcısı “Ariana Əfqan Hava Yolları” şirkəti mayın 24-dən etibarən paytaxt Kabil ilə Çinin Sincan Uyğur Muxtar Rayonunun paytaxtı Urumçi şəhəri arasında müntəzəm sərnişin təyyarəsi uçuşlarını bərpa edib.
AZƏRTAC şirkətin açıqlamasına istinadla xəbər verir ki, sözügedən istiqamətdə müntəzəm uçuşlar COVID-19 böhranı səbəbindən təxminən üç il idi dayanmışdı. Uçuşlar həftədə bir dəfə reallaşacaq. “Ariana Əfqan Hava Yolları” iki ölkə arasında birbaşa uçuşları yerinə yetirən yeganə şirkətdir.
Əfqanıstanın nəqliyyat və aviasiya nazirinin müavini Qulam Cilani Vəfa bildirib ki, iki ölkə arasında birbaşa uçuşların bərpası iqtisadi-ticari əlaqələrin inkişafına müsbət təsir göstərəcək.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
