Əfqanıstan Prezidenti ABŞ qoşunlarının bu ölkədə saxlanılması xərclərini azaltmağı təklif edir
Bakı, 31 yanvar, AZƏRTAC
Əfqanıstan Prezidenti Əşrəf Qani ABŞ qoşunlarının bu ölkədə saxlanılması xərclərini azaltmaq təklifi ilə Prezident Donald Trampa məktub ünvanlayıb.
AZƏRTAC “The New York Times” qəzetinə istinadla xəbər verir ki, Əşrəf Qani məktubunda amerikalı hərbçilərin xərclərinin azaldılması və Əfqanıstanda qulluq edən ABŞ əsgərlərinin sayının ixtisar edilməsi yollarını müzakirə etməyi xahiş edib.
Əfqanıstan Prezidenti ötən həftə Davosda keçirilən Dünya İqtisadi Forumunda da bu məsələni gündəmə gətirmişdi.
ABŞ-ın Kabil şəhərindəki səfirliyi və Əşrəf Qaninin özü məktuba şərh verməkdən imtina edib.
Ötən il dekabr ayının sonlarında “The Wall Street Journal” qəzeti ABŞ Prezidenti Donald Trampın Əfqanıstandan 7 min hərbçinin çıxarılması planını hazırlamaq üçün Pentaqona göstəriş verdiyini yazmışdı. Ağ evin Milli Təhlükəsizlik Şurasının mətbuat katibi Harrett Marki isə öz növbəsində bu informasiyanı təkzib etmişdi.
Rəsmi məlumata əsasən, hazırda Əfqanıstanda 14 minə yaxın amerikalı hərbçi xidmət edir. Onlar hərbi əməliyyatlarda iştirak etməklə yanaşı, ölkənin güc strukturlarının hazırlığı ilə məşğul olur. Bundan əlavə, Əfqanıstanda NATO-ya üzv ölkələrin təxminən 16 min nəfərlik kontingenti dislokasiya olunub.
Bölmənin digər xəbərləri
