Əkiz bacılar: Atamızın arzusu hər üç qızının BDU məzunu olmasıdır
Bakı, 18 sentyabr, AZƏRTAC
Əkiz bacılar Nərmin və Nəzrin Məmmədovalar bu ildən eyni universitetin tələbələridir. Tovuz rayonunun İsmayıl Mürsüdov adına Aşağı Quşçu kənd tam orta ümumtəhsil məktəbini bitirən bacılar ali təhsil üçün də eyni ünvanı – Bakı Dövlət Universitetini (BDU) seçiblər. Bunun xüsusi səbəbi var – atalarının illər əvvəl hər üç qızının məhz bu universitetin məzunu olması ilə bağlı arzusunu gerçəkləşdirmək.
BDU-dan AZƏRTAC-a bildirilib ki, Nərmin və Nəzrinin böyük bacısı Xəyalə Məmmədova da BDU-nun Hüquq fakültəsinin magistratura pilləsinin məzunudur. Bu il 583 balla BDU-nun Hüquq fakültəsinə qəbul olan Nəzrin və 547 balla dövlət və ictimai münasibətlər ixtisasını seçən Nərmin bununla atalarının arzusunun gerçəkləşməsinə bir addım da yaxınlaşıblar. Fərqli ixtisaslar seçsələr də, bacıları BDU-da birləşdirən əsas cəhət uğurlu gələcək qurmaq və seçdikləri sahədə özlərini doğrultmaq istəyidir.
Uşaqlıqdan siyasətə maraq göstərdiyini bildirən Nərmin deyib: “Dövlətlərarası münasibətlər, ictimai proseslər və bu istiqamətdə baş verən hadisələr həmişə diqqətimi çəkib. Gələcəkdə Azərbaycanı xarici ölkələrdə təmsil etmək məni çox sevindirər. Düşünürəm ki, dövlət və ictimai münasibətlər ixtisası bu istiqamətdə özümü inkişaf etdirməyim üçün yaxşı imkanlar yaradır. Diplomat olmaq istəyirəm”.
Nərmin vurğulayıb ki, BDU ölkəmizin ən nüfuzlu universitetlərindən biridir: “Hazırlıq vaxtı bilirdim ki, BDU Azərbaycanın ilk universitetidir. Belə tarixi və nüfuzlu universitetdə təhsil almaq mənim üçün böyük qürurdur. BDU-nu seçməyimizdə atamın arzusu da xüsusi rol oynayıb. O, hər üç qızının BDU məzunu olmasını həmişə arzulayıb. Böyük bacımız Xəyalə artıq BDU-nun magistratura pilləsini bitirib. İndi isə Nəzrinlə mənim burada tələbə olmağımız atamızın arzusunun gerçəkləşməsi deməkdir”.
Tələbəlik illəri üçün planlarından söz açan Nərmin deyib: “Xarici dillər öyrənmək, dünyagörüşümü genişləndirmək, könüllülük layihələrində iştirak etmək, beynəlxalq forumlara qatılmaq və yeni təcrübələr qazanmaq da planlarım arasındadır. Düşünürəm ki, bunlar gələcəkdə mənə çox kömək edəcək”.
Onun fikrincə, gənclər müxtəlif ictimai fəaliyyətlərdə iştirak etməklə daha çox sosiallaşır, yeni çevrə qazanır və cəmiyyətdə müəyyən yer tuturlar. Belə fəaliyyətlər onları daha təcrübəli və gələcək həyatlarına hazırlıqlı edir.
Nəzrin isə böyük bacısını özünə nümunə götürüb və hüquq sahəsini seçib: “Bacım Xəyalə Məmmədova vəkildir və magistr təhsilini də BDU-da alıb. Onu özümə nümunə götürmüşəm. Bacımın peşəsinə olan sevgisi, fəaliyyəti məndə də hüquq sahəsinə maraq yaradıb. Gələcəkdə vəkil və ya prokuror olmaq istəyirəm. Təhsil müddətində hüququn müxtəlif istiqamətləri ilə daha yaxından tanış olduqca hansı sahənin mənə daha uyğun olduğunu müəyyənləşdirəcəyəm”.
BDU-nu seçməsinin səbəbini Nəzrin belə izah edir: “Vaxtilə dərsliklərdə haqqında oxuduğum universitetdə indi özümün təhsil almağım böyük uğurdur. Bunda atamın arzusu ilə yanaşı, böyük bacım Xəyalənin də təsiri olub. Eyni universitetdə təhsil alaraq onun başladığı yolu davam etdirmək mənim üçün böyük motivasiyadır”.
Nəzrin universitet illərində həm yaxşı təhsil almaq, həm də özünü peşəkar cəhətdən inkişaf etdirmək arzusundadır: “Qiyabi təhsil forması seçdiyim üçün özümü praktik istiqamətdə də inkişaf etdirəcəyəm. Bacımın da bu sahədə mənə dəstək olacağına inanıram.
Universitet illəri həm bilik qazanmaq, həm də insanlarla ünsiyyət qurmaq, müxtəlif təcrübələr əldə etmək üçün böyük fürsətdir. Bu baxımdan ictimai fəaliyyətlər gənclərin dünyagörüşünün formalaşmasına kömək edir”.
Bölmənin digər xəbərləri
