Ekspert: Azərbaycanda metal istehlakında artım 2035-ci ilədək davam edəcək
Moskva, 14 avqust, AZƏRTAC
Azərbaycanda ümumi metal istehlakı 1,7-1,8 milyon ton olaraq qiymətləndirilir və bu rəqəmin 2035-ci ilə qədər davamlı artacağı gözlənilir.
AZƏRTAC xəbər verir ki, bu barədə “Metals & Mining Industrial and Technical Consulting” (MMITC) şirkətinin bazar analitiki və layihə meneceri Pavel Serov Rusiyanın “Metal Supply and Sales” jurnalına verdiyi müsahibədə bildirib.
Onun sözlərinə görə, 2025-ci ildə Azərbaycanda tədqiq edilən sort və fason prokatının istehlakı əvvəlki illə müqayisədə əhəmiyyətli dərəcədə artımla 600 min tonu keçib. Tədqiqat armatur, məftil çubuğu, katanka və kiçik növlü prokatı əhatə edib. 2024-cü ildə ölkədə daxili armatur istehsalı idxal istisna olmaqla 440 min ton təşkil edib.
Baza proqnozuna görə, müəyyən bazar seqmentlərində orta illik artım tempi 2035-ci ilə qədər 4 faizi keçə bilər. Bu, genişmiqyaslı tikinti və infrastruktur layihələrinin həyata keçirilməsi, sənayenin inkişafı, bərpaolunan enerji və şəbəkənin modernləşdirilməsi ilə əlaqədardır.
Proqnozda Bakı Metropoliteninin genişləndirilməsi, yol və digər infrastruktur obyektlərinin tikintisi, Heydər Əliyev Beynəlxalq Hava Limanı terminalının modernləşdirilməsi, Qarabağ və Şərqi Zəngəzurda bərpa işləri və enerji layihələri nəzərə alınıb.
Ən sürətli artım katanka və xüsusi tikinti prokat məhsulları seqmentlərində gözlənilir.
P.Serov qeyd edib ki, “Baku Steel Company” Azərbaycan bu məhsulların bazarında ən böyük iştirakçıdır. O, Rusiya, İran və Türkiyəni Azərbaycana idxal olunan metal məhsullarının əsas təchizatçıları arasında qeyd edib.
Bölmənin digər xəbərləri
