Əlcəzairdə meşə yanğınları nəticəsində beş nəfər həlak olub
Qahirə, 10 avqust, AZƏRTAC
Əlcəzairin Tizi-Uzu vilayətində meşə yanğınları davam edir.
AZƏRTAC xəbər verir ki, rəsmi APS agentliyi yanğınlar nəticəsində 5 nəfərin həlak olması barədə məlumat yayıb.
Vilayətin qubernatoru Məhəmməd Yusif jurnalistlərə müsahibəsində bildirib ki, meşə yanğınları təbii fəlakət deyil, təxribatın nəticəsidir. Havanın həddindən çox isti olması və güclü külək yanğının lokallaşdırılması üçün maneə törədir.
Qubernator deyib ki, vilayətin hüquq-mühafizə orqanları yanğınları törədən şəxslərin aşkar edilməsi istiqamətində əməliyyat-axtarış tədbirləri həyata keçirirlər.
Əlcəzair Mülki Müdafiə Departamentinin məlumatına görə, Tizi-Uzu vilayəti ilə yanaşı, ölkənin daha 14 bölgəsində 31 meşə yanğını qeydə alınıb.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
