Bakı, 22 sentyabr, AZƏRTAC

Prezident İlham Əliyevin bu il avqustun 23-də təsdiq etdiyi “Azərbaycan Respublikasında sosial xidmətin inkişafına dair 2023-2026-cı illər üçün Dövlət Proqramı”nda sosial xidmət müəssisələrində əhalinin bütün həssas qruplarına göstərilən sosial xidmətlərin kəmiyyət və keyfiyyətinin artırılması, xidmətlərə əlçatanlığın təmin edilməsi və sosial səmərəlilik prinsiplərinin gerçəkləşdirilməsi istiqamətində müvafiq tədbirlərin həyata keçirilməsi hədəf kimi nəzərdə tutulur. Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin 2 saylı 18 yaşınadək əlilliyi müəyyən edilmiş şəxslər üçün Sosial Xidmət Müəssisəsində bu sahədə bir sıra işlər həyata keçirilir. Müəssisədə sakinlər sosial-məişət, sosial-psixoloji, sosial-pedaqoji və tibbi-sosial xidmətlərlə təmin olunurlar.

Müəssisənin direktoru Pərvanə Səfərova AZƏRTAC-ın müxbiri ilə söhbətində deyib: “Uşaqlara göstərilən xidmətin keyfiyyətinin yüksəldilməsi, müəssisənin strukturunun müasir tələblərə uyğunlaşdırlması ilə bağlı bir sıra addımlar atılıb. Sakinlərin münasib yaşayış şəraiti və reinteqrasiya xidmətləri ilə təmin edilməsi, sosial reabilitasiyanın təşkili, onlara psixoloji, sosial-pedaqoji yardımın göstərilməsi sahəsində tədbirlər görülür. Hazırda müəssisədə 141 nəfərə zəruri xidmətlər göstərilir. Sakinlərin 88-i oğlan, 53-ü qız uşaqlarıdır. Onların 14 nəfəri hər iki valideynini, 42 nəfəri isə bir valideynini itirib. Müəssisəmizdə sakinlərə 102 nəfər işçi xidmət edir. Müəssisənin nəzdində yaradılan Günərzi Qayğı Mərkəzində 10 nəfər sakinə yarımstasionar formada xidmət göstərilir”.

Direktor deyib: “5-18 yaşlı təhsilə cəlb olunmayan əlilliyi müəyyən edilmiş şəxslərə koqnitiv, özünəxidmət, motor, sensor, sosial bacarıqlarının inkişafı istiqamətində fərdi və qrup şəklində “Müşahidə”, “Ritmlərin dəyişməsi”, “Hava topu”, “Tütək”, “Art terapiya”, “Relaksasiya”, “Vizual öyrənmə“, “Tənəffüs”, “Kukla”, “Holdinq”, “Vizualizasiya”, “Mükafatlandırma”, “Oyun terapiyası”, “Neyrogimnastik məşqlər” metodları vasitəsilə məşğələlər aparılır. Uşaqların nitq bacarıqlarının inkişafı istiqamətində fərdi və qrup seanslarında loqopedik, sosial, motor, koqnitiv və əməyə olan bacarığın artırılması istiqamətində fərdi və qrup şəklində müxtəlif metodlarla keçilən əmək məşğələləri onların inkişafında çox müsbət rol oynayır. Motor, qavrama, sosial, özünəxidmət və emosional vəziyyətinin sabitləşdirilməsi istiqamətində fərdi və qrup şəklində müalicəvi rəqs terapiyası, sosial, qavrama, emosional vəziyyəti sabitləşdirmə və xüsusi musiqi bacarıqlarının formalaşdırılması üçün fərdi və qrup seanslarında musiqi məşğələləri də çox faydalı təsir göstərir. Uşaqların emosional vəziyyətinin sabitləşdirilməsi, asudə vaxtın səmərəli təşkili, təxəyyülün formalaşdırılması istiqamətində fərdi və qrup şəklində kitabxanada keçirilən məşğələlər, qavrama, sosial, motor, asudə vaxtın səmərəli təşkili ilə bağlı qrup şəklində çoxprofilli komanda olaraq nağıl otağındakı məşğələlər də onların böyük marağına səbəb olur. Mentor və metodistlərin həyata keçirdiyi məşğələlərdə “Musiqi və rəqsli oyunlar”, “Oyuncaq dostlarımız”, “Art terapiya”, “Leqolarla oyun”, “Bu nədir?”, “Müşahidə”, “Mükafatlandırma” metodları tətbiq olunur, bu isə onların koqnitiv, özünəxidmət, motor, sosial, nitq bacarıqlarının inkişafında böyük irəliləyişə səbəb olur”.

Sosial xidmət müəssisəsində yaşayan sakinlərin 18 yaşı tamam olanda ailələrinə reinteqrasiya olunurlar və ya ailənin istəyinə uyğun olaraq sakinlər qeydiyyat əraziləri nəzərə alınaraq müvafiq psixonevroloji sosial xidmət müəssisələrinə köçürülərək daimi dövlət qayğısı ilə əhatə olunurlar.