Elxan Məmmədov: Azərbaycan çempionatının yeni mövsümündə klubların sayı 10-dan çox olmayacaq
Bakı, 29 yanvar, AZƏRTAC
Azərbaycan Premyer Liqasının yeni mövsümündə klubların sayı 10-dan çox olmayacaq.
AZƏRTAC xəbər verir ki, bunu AFFA-nın icraçı vitse-prezidenti Elxan Məmmədov yanvarın 29-da keçirilən mətbuat konfransında deyib.
E.Məmmədov bildirib: “AFFA-nın ümumi strategiyası var. Məqsəd Premyer Liqada minimum 10 komandanın iştirak etməsidir. Bu məsələ martda yenidən müzakirə olunacaq. Biz bölgə klublarını maliyyələşdiririk ki, hansısa iş adamı futbola dəstək versə, ona hazır məhsul təqdim edək. Bölgələrdə peşəkar futbolun yaşaması bizim üçün vacibdir”.
Gələcəkdə iş adamlarının bu işə dəstək verəcəklərinə ümidvar olduğunu vurğulayan E.Məmmədov bildirib: “Biz onlardan bu addımı gözləyirik. Bölgələrdə böyük müəssisələrlə əlaqə saxlayır, onları klubla bağlı məlumatlandırırıq. Bəzən mətbuatda yazırlar ki, AFFA bəzi klubları Premyer Liqaya buraxmır. Bu, belə deyil. İstəyirik ki, keyfiyyət balansı pozulmasın. Azərbaycan çempionatı üçün 10 klub idealdır, 12 klub isə riskdir. Klubun ənənəsi olmalıdır”.
Bölmənin digər xəbərləri
