Epizootiya əleyhinə fövqəladə komissiyanın iclası keçirilib
Bakı, 1 fevral, AZƏRTAC
Qida Təhlükəsizliyi Agentliyinin təşkilatçılığı ilə ölkə üzrə epizootiya əleyhinə fövqəladə komissiyanın iclası keçirilib.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, iclasda Daxili İşlər, Fövqəladə Hallar, Kənd Təsərrüfatı, Ekologiya və Təbii Sərvətlər, Səhiyyə nazirliklərinin, şəhər və rayon icra hakimiyyətinin nümayəndələri iştirak ediblər.
İclasda çıxış edən Qida Təhlükəsizliyi Agentliyinin sədr müavini, epizootiya əleyhinə fövqəladə komissiyanın sədri Balarəhim Quliyev ölkə ərazisində xüsusi təhlükəli heyvan xəstəlikləri baş verdikdə qoruyucu karantin, xüsusi baytarlıq və digər tədbirlərin həyata keçirilməsi qaydalarının müəyyənləşdirilməsi, baş vermiş xəstəliyin yayılma təhlükəsi olan zonalarda qanunla müəyyən edilmiş hallarda və qaydada məhdudiyyət və xəbərdarlıq təyinatlı tədbirlərin görülməsi, heyvanların kəsilməsi və ya məhv edilməsi, heyvan mənşəli xammalın, baytarlıq preparatlarının, yem və yem əlavələrinin zərərsizləşdirilməsi və ya utilizasiya edilməsi haqqında icrası məcburi göstərişlərin verilməsinin agentliyin vəzifələrindən olduğunu diqqətə çatdırıb.
İclasda heyvan və insanlar üçün təhlükəli olan xəstəliklərə qarşı mübarizə işlərinin vəziyyəti, konkret təkliflərin hazırlanaraq həyata keçirilməsi və epizootiya əleyhinə fövqəladə komissiyanın tədbirlər planının layihəsi müzakirə olunub.
Bölmənin digər xəbərləri
