ERMƏNİ MİLLƏTÇİLƏRİNİN CİNAYƏTLƏRİNİ İFŞA ETMƏK HAMIMIZIN BORCUDUR
Müəllif yazır ki, “Dənizdən dənizə böyük Ermənistan” mifik dövləti yaratmaq məqsədi ilə, ilk növbədə, türk xalqlarının məhvinə yönəldilmiş “ermənilik” ideyasını yayan hələ XIX əsrin axırlarında yaradılmış “Daşnaksutyun” partiyası olmuşdur. Bu ideyanın gerçəkləşdirilməsinə doğru yol isə ermənilərin dünyanın hər yerində törətdikləri kütləvi qırğınlardan, terror aktlarından keçirdi.
Əslində, erməni siyasətçiləri mahiyyətcə faşizm psixologiyası və ideologiyasının baniləridir. Axı, Adolf Hitlerin başçılıq etdiyi Nasional- Sosialist Partiyasının Almaniyada hakimiyyətə gəlməsindən hələ xeyli qabaq erməni vəhşiləri ən qəddar işgəncə üsullarını artıq insanlar üzərində sınaqdan çıxarmışdılar. Azərbaycanlılara və türklərə qarşı törədilmiş soyqırımlar barədə təkzibolunmaz tarixi faktlar göstərir ki, minlərlə dinc sakin işgəncə ilə qətlə yetirilmiş, bir çox qədim məskənlər talan edilərək Yer üzündən silinmiş, tarixi abidələr mənimsənilərək “erməniləşdirilmişdir”. Qadınlara, uşaqlara və qocalara aman verməyən erməni cəlladları 1992-ci ildə daha bir qırğın törətmişlər. Bu, Azərbaycanın ən yeni tarixinin növbəti qanlı səhifəsinə çevrilən Xocalı soyqırımı idi.
...İkinci Dünya müharibəsi illərində bəşəriyyət görünməmiş həmrəylik nümayiş etdirərək, XX əsrin dəhşətli bəlasına - faşizmə qarşı mübarizədə birləşdi. Azərbaycanın oğul və qızları Böyük Vətən müharibəsi cəbhələrində vuruşur, arxadakılar isə Qələbəni yaxınlaşdırmaq üçün mümkün olan hər şeyi edirdilər. Bu gün hamıya belə bir fakt məlumdur ki, sovet tankları və təyyarələrini hərəkətə gətirən Azərbaycan nefti olmadan Böyük Qələbəni qazanmaq mümkün deyildi. Lakin sonradan elə həmin tanklar 1990-cı ilin yanvarında xalqımızın üstünə yeridildi. Bu da Mixail Qorbaçovun ən yaxın müşavir və köməkçiləri olan ermənilər tərəfindən Azərbaycan və rus xalqlarının çoxəsrlik dostluğuna son qoymaq məqsədi ilə törədilmiş təxribat idi.
Müəllif tarixi faktlar əsasında, ədəbi və sənədli mənbələrə istinad edərək, V.Veliçko, İ.Çavçavadze, S.Qlinka, J. de Malevil, C.Makkarti, C.Frezer kimi rus və əcnəbi müəlliflərdən sitatlar gətirərək, “erməniliyin” mahiyyətini, onun müasir ideoloqları Z.Balayan və S.Kaputikyanın fəaliyyətini, erməni daşnaklarının - bolşevizm ideyaları ilə pərdələnən S.Şaumyanın, S.Osepyanın, A.Əmiryanın, sovet dövlət xadimi A.Mikoyanın, erməni neofaşizminin ideoloqu A.Aqanbekyanın və sairlərinin cinayətlərini ifşa edir.
Müəllif eyni zamanda təəssüflə vurğulayır ki, ilk növbədə müstəqil Azərbaycanın ərazi bütövlüyünə, ümumən xalqımızın mənafeyinə qarşı yönəldilmiş “ermənilik” kimi bəla ilə ziyalılarımızın ideoloji mübarizəsinə əngəl törətməyə çalışan qüvvələr respublikada hələ də var. Belə başabəla populist siyasətçilər ümummilli liderimiz Heydər Əliyevin böyük ideyalarını tənqid etmək azarına tutulublar. Halbuki Azərbaycan tarixində ilk dəfə olaraq, məhz ulu öndərimiz erməniləri xalqımıza qarşı saysız-hesabsız soyqırımı və vəhşilik törətməkdə cəsarətlə ittiham etmişdir. Ulu öndərin 1948-1953-cü illərdə azərbaycanlıların Ermənistan SSR ərazisindəki tarixi-etnik torpaqlarından kütləvi deportasiyası və azərbaycanlıların soyqırımı haqqında imzaladığı buna sübutdur.
Kitabda Asala erməni terrorçu təşkilatı üzvlərinin müxtəlif vaxtlarda dünyanın bir çox şəhərlərində, ilk növbədə, türk diplomatları əleyhinə törətdikləri terror aktlarının ətraflı siyahısı, erməni işğalçılarının xalqımıza vurduğu ziyan haqqında statistik məlumat və ermənilərin cinayətkar siyasətini ifşa edən digər faktlar verilmişdir.
Müəllif ümidvar və əmin olduğunu bildirir ki, xarici ölkələrdə yaşayan ziyalılarımız, həmvətənlərimiz ermənilərin indiyədək cəzasız qalan cinayətlərini ifşa etmək kimi haqq işində onu dəstəkləyəcəklər. Bundan ötrü isə belə kitablar təkcə Azərbaycan və rus dillərində deyil, bir çox xarici dillərdə də çap olunaraq, bütün dünyada yayılmalıdır.
Bölmənin digər xəbərləri
