Erməni millətçilərinin Xocalıda törətdiyi vandalizm aktı bəşəri cinayətdir
Şəki, 26 fevral (AZƏRTAC). Xocalı faciəsinin 22-ci ildönümü ilə əlaqədar fevralın 26-da Sabit Rəhman adına Şəki Dövlət Dram Teatrında anım mərasimi keçirilmişdir.
AzərTac xəbər verir ki, şəhər rəhbərliyi və ictimaiyyət nümayəndələrinin iştirak etdiyi tədbirdə Xocalı faciəsinin səbəbləri və mahiyyəti, erməni cəlladlarının vəhşilikləri konkret faktlarla bir daha xatırlanmışdır. Qeyd olunmuşdur ki, bu hadisələr milli əlamətinə görə insanların tamamilə və ya qismən məhv edilməsi niyyəti ilə törədilmişdir və beynəlxalq hüquqa əsasən soyqırımı hesab olunur. Erməni millətçilərinin törətdiyi bu vəhşilik və vandalizm aktı eyni zamanda bəşəri cinayətdir.
Mərasimdə Xocalıdan olan məcburi köçkünlər Eldəniz Məhərrəmov və Möhübbət Əliyev çıxış edərək qaçqın və məcburi köçkünlərə göstərilən diqqət və qayğıya görə Prezident İlham Əliyevə minnətdarlıqlarını bildirmiş, dövlətimizin başçısının qətiyyəti sayəsində işğal altında olan torpaqlarımızın tezliklə azad olunacağına əminliklərini ifadə etmişlər.
Həmin gün rayonda məskunlaşmış Xocalıdan olan 100-dək məcburi köçkün ailəsinə şəhər icra hakimiyyəti tərəfindən maddi yardım göstərilmişdir.
Bölmənin digər xəbərləri
