Ermənistan işğalçı olduğunu bir daha təsdiqlədi
Bakı, 1 may, AZƏRTAC
Uzun illərdir davam edən Ermənistan-Azərbaycan, Dağlıq Qarabağ münaqişəsinin nizamlanmamasının əsas səbəbi Ermənistanın işğalçılıq siyasətindən əl çəkməməsi, bir də dünyada hökm sürən ikili standartlar, dünya birliyinin ayrı-seçkiliyidir. İşğalçı ölkənin beynəlxalq hüququn norma və prinsiplərinə hörmətsizliyinin və saymazlığının dünyada sükutla qarşılanması Ermənistanı daha da həyasızlaşdırıb. Bu ölkədə “məxməri inqilab” yolu ilə hakimiyyət dəyişikliyi baş verəndə və Nikol Paşinyanın ölkəyə rəhbərliyi başlayanda beynəlxalq ictimaiyyət Ermənistanın işğalçı siyasətə son qoyacağına, münaqişənin beynəlxalq hüquq normaları çərçivəsində həllinə böyük ümid bəsləyirdi. Ancaq hər şey gözlənildiyinin əksinə oldu. Sən demə, Paşinyan sələflərindən də betər işğalçı imiş. Onun tez-tez işğal olunmuş Azərbaycan ərazisinə səfərləri, hətta öz oğlunun bu ərazilərdə hərbi xidmət keçməsinə şərait yaratması sülh danışıqlarının üstündən xətt çəkdi.
AZƏRTAC xəbər verir ki, bu fikirləri Azərbaycan Azad Respublikaçılar Partiyasının sədri, siyasi elmlər üzrə fəlsəfə doktoru Kamil Seyidov bildirib
Kamil Seyidov deyib ki, dünya birliyinin gözü önündə baş verən hadisələr də təsdiqləyir ki, Ermənistan işğalçı siyasətindən əl çəkmək fikrində deyil, üstəlik, bu ölkənin dövlət rəsmləri müxtəlif bəyanatlarla işğalçı olduqlarını açıq şəkildə təsdiqləyirlər. Ermənistan Xarici İşlər nazirinin Rusiyanın Xarici İşlər naziri Sergey Lavrovun açıqlamasına cavabı da bunu təsdiqlədi.
Məlum olduğu kimi, Rusiyanın Xarici İşlər naziri Sergey Lavrov Dağlıq Qarabağ münaqişəsi ilə bağlı önəmli açıqlamalar verib. O, Moskvada Qorbaçov Fondunda “dəyirmi masa”da iştirak edərkən danışıqlar masasında duran sənədlərə toxunub. Deyib ki, Qarabağ münaqişəsinin həllində Madrid prinsipləri, Rusiyanın 2010-2011-ci illərdə hazırladığı sənədlər, o cümlədən Kazan sənədi, həmçinin, Azərbaycan, Ermənistan və Rusiya XİN rəhbərlərinin 2019-cu ilin aprelində qəbul etdiyi ortaq sənəd var.
Sergey Lavrov həmin sənədlərin münaqişənin mərhələli yolla həllini nəzərdə tutduğunu əlavə edib. Bildirib ki, münaqişənin həllində mərhələli həll nəzərdə tutulur. İlk mərhələdə ən aktual məsələlərin - Dağlıq Qarabağ ətrafındakı bir sıra rayonların azad olunması və kommunikasiya, nəqliyyat və iqtisadi əlaqələrin bərpası və s. nəzərdə tutulur. Rusiyalı diplomat BMT Təhlükəsizlik Şurasının 1990-cı illərdə Qarabağda hərbi əməliyyatları dayandırmağı tələb etdiyini və indiki atəşkəs rejimində isə tərəflərin sülh yolu ilə münaqişəni yekun həll etməyi mümkün sayıb.
Rusiya Xarici İşlər nazirinin bu açıqlamasından sonra Ermənistan tərəfi işğalçı siyasətini ört- basdır edə bilməyib və bunu bir daha rəsmən təsdiqləyib. Məlum olduğu kimi, bu ölkənin Xarici İşlər naziri Zöhrab Mnatsakanyan Sergey Lavrovun açıqlamasına cavab verərək, Azərbaycan ərazilərinin işğaldan azad edilməyəcəyini bildirib. O, bu açıqlaması ilə indiyə qədər aparılmış danışıqlar prosesi və münaqişənin mərhələli həlli ilə bağlı təklifləri rədd və inkar etdiyini açıq şəkildə ortaya qoyub.
Dünya ictimaiyyətinə də bəllidir ki, Ermənistan 30 ilə yaxındır ölkəmizə qarşı hərbi gücdən istifadə etməklə beynəlxalq miqyasda tanınmış ərazilərimizin beşdəbirini işğal edib və burada yaşayan bir milyondan artıq soydaşımızı etnik təmizləməyə məruz qoyub. Qarabağın əhalisinin üçdəbirinin öz daimi yaşayış yerlərindən didərgin salındığı və 30 ilə yaxındır ki, evlərinə qayıtmaq imkanından və öz bölgələrinin gələcəyinə dair azad iradə nümayiş etdirilməsindən məhrum olduqları bir vaxtda həm Qarabağ əhalisinin təhlükəsizliyi, həm də azad iradənin nümayiş etdirilməsindən danışmaq, təbii ki, mənəviyyatsızlıqdır. Belə bir vəziyyətdə işğalçı ölkənin Xarici İşlər nazirinin təhlükəsizlik problemlərindən, müqəddəratı azad şəkildə ifadə etməkdən danışması həyasızlıqdır.
Ermənistan-Azərbaycan, Dağlıq Qarabağ münaqişəsinin Helsinki Yekun Aktının prinsipləri və BMT Təhlükəsizlik Şurasının qətnamələri əsasında mərhələli şəkildə həll edilməsi və bu mərhələli proses çərçivəsində ilkin addım kimi, Azərbaycanın Dağlıq Qarabağ regionu ətrafındakı ərazilərdən Ermənistan qoşunlarının çıxarılması həmsədr ölkələrin dövlət başçıları səviyyəsində verdikləri bəyanatlarında da təsbit olunub. Həmçinin həmsədrlərin 2019-cu il 9 mart tarixli bəyanatında da münaqişənin mərhələli həllinə dair mövqeyi bir daha qeyd olunub.
BMT Təhlükəsizlik Şurasının məlum qətnamələrində Azərbaycana qarşı gücdən istifadə edilməsi pislənilir, ölkəmizin ərazi bütövlüyü və suverenliyi bir daha təsdiq olunur və Ermənistan qoşunlarının dərhal, tam və qeyd-şərtsiz işğal olunmuş ərazilərdən çıxarılması tələb edilir.
İşğalçı Ermənistanın dövlət rəsmlərinin belə bəyanatlarla çıxış etməsi, ilk növbədə, mövcud status-kvonu saxlamağa köklənib. Bu sərsəm bəyanat, həm də beynəlxalq hüquq normalarına qarşı saymazlıq, eyni zamanda, işğalçılıq siyasətini rəsmən təsdiqləməkdir. Ancaq unudurlar ki, 2016- cı ilin aprel döyüşlərində olduğu kimi, işğalçı ordunu darmadağın edən Azərbaycan Silahlı Qüvvələri daha qüdrətli, daha mətin olub.
Bölmənin digər xəbərləri
