ERMƏNİSTAN NÜMAYƏNDƏ HEYƏTİNİN RƏHBƏRİNƏ SƏRT CAVAB VERİLMİŞDİR
Boris Çileviç Ermənistan-Azərbaycan, Dağlıq Qarabağ münaqişəsinin dinc yolla həllinin qaçqın və məcburi köçkün probleminin aradan qaldırılmasının yeganə yolu olduğunu bildirərək demişdir ki, hər iki ölkə bu problemlə bağlı Avropa Şurası qarşısında götürdükləri öhdəlikləri yerinə yetirməli, Avropa Şurası da öz növbəsində məsələnin həllini tezləşdirməlidir.
Məruzə ətrafında çıxış edən deputatlar problemin həllinə ehtiyatla, hüquqları tapdalanmış bu insanların hissiyyatına toxunmamaq şərtilə yanaşmağı təklif etmiş, Ermənistanın təcavüzkar siyasəti nəticəsində doğma torpaqlarından didərgin düşmüş bir milyon azərbaycanlının dözülməz şəraitdə yaşadıqlarını bəyan etmişlər. Bildirilmişdir ki, hərbi birləşmələri oradan çıxarmaq, qaçqın və məcburi köçkünləri öz yerlərinə qaytarmaq üçün istər Avropa Şurası, istərsə də bu məsələdə marağı olan dövlətlər öz imkanlarından istifadə etməlidir.
Azərbaycan nümayəndə heyətinin rəhbəri Səməd Seyidov çıxışında demişdir ki, bu problemi həll etmək üçün əvvəlcə onu doğuran səbəbi araşdırmaq lazımdır. Əsas səbəb Ermənistanın işğalçılıq siyasətidir. Qonşu dövlətin təcavüzü Azərbaycanda bir milyon azərbaycanlını qaçqın və məcburi köçkün vəziyyətinə salmışdır. O, belə bir ciddi məsələnin yaz sessiyasının son iş günündə, deputatların əksəriyyətinin iştirak etmədiyi bir vaxtda müzakirə olunmasından təəssüfləndiyini vurğulamışdır.
Ermənistan parlamenti nümayəndə heyətinin başçısı Tiqran Torosyan erməni xislətinə sadiq qalaraq, Bakı və Sumqayıt hadisələrinə toxunmuş, Azərbaycandan 500 min erməninin qovulduğunu, guya Azərbaycan tərəfinin qaçqın və məcburi köçkünlərin sayını şişirtməklə dünya ictimaiyyətini çaşdırdığını bildirmişdir.
Yekun çıxışında Boris Çileviç məruzə ətrafındakı çıxışlara öz münasibətini bildirmiş, S.Seyidovun Avropa Şurasının ünvanına söylədiyi iradla tamamilə razılaşmışdır. Məruzəçi Ermənistan nümayəndə heyətinin rəhbərinin çıxışına qəti etirazını bildirərək ona sərt cavab vermiş, Tiqran Torosyanın göstərdiyi rəqəmlərin məruzədə əksini tapmadığını, bunun erməni deputatının uydurma məlumatı olduğunu xüsusi vurğulamışdır.
Məruzə ilə bağlı qətnamədə 35 düzəliş edilmişdir. Azərbaycan deputatlarının düzəlişlə bağlı təkliflərinin əksəriyyəti yekdilliklə qəbul olunmuşdur.
Qəbul olunmuş qətnamədə itkin düşmüş insanların axtarışı ilə əlaqədar ümumi informasiya mərkəzinin yaradılması qərara alınmış, Avropa Şurasının Cənubi Qafqazda qaçqın və məcburi köçkün problemini dünya ictimaiyyəti qarşısında bir daha qabartmasının və onun həlli üçün beynəlxalq təşkilatların və aparıcı dövlətlərin səylərinin birləşdirməsinin vacibliyi öz əksini tapmışdır.
Bununla da yaz sessiyası öz işini başa çatdırmışdır.
Bölmənin digər xəbərləri
