Federasiya prezidenti: Tarixi-hərbi Zəfərimiz gənclərə yenilməz güc bəxş edib
Bakı, 7 noyabr, AZƏRTAC
“Tariximizin ən şanlı səhifələrindən olan 44 günlük Vətən müharibəsində qazanılan möhtəşəm Qələbəni sonsuz fəxarət hissi ilə qeyd edirik. Azərbaycan müstəqilliyinin ən şərəfli, qürurlu çağlarını xalqımız böyük sevinc içərisində yaşayır. Şanlı tariximiz olan Vətən müharibəsində qazanılan böyük Zəfərin ölkə qarşısında açdığı üfüqlər sonsuzdur. Bu böyük Qələbə əsrlər boyu şanlı qəhrəmanlıq salnaməsi kimi xalqımızın yaddaşında yaşayacaq”.
Bu sözləri AZƏRTAC-a açıqlamasında Azərbaycan Alpaqut Federasiyasının prezidenti, idman siyasəti üzrə ekspert Qüdrət Nuriyev deyib.
Vətən müharibəsində Azərbaycan gəncliyinin həlledici rolunu xüsusi vurğulayan Q.Nuriyev qeyd edib ki, şanlı Zəfər müstəqillik dövründə vətənpərvər, tarixi yaddaşı qoruyub saxlayan, yenilməz gənc nəslin yetişdiyini bütün dünyaya nümayiş etdirdi: “Öhdəsinə düşən vəzifələri həmişə layiqincə yerinə yetirən, ölkədə gedən proseslərin daim önündə olması ilə diqqət çəkən gənclərimizin Vətən müharibəsində göstərdikləri qəhrəmanlığa bütün dünya heyran oldu. 44 günlük müharibə başlayanda gənclərimiz Vətən qarşısında borclarını yerinə yetirmək üçün Səfərbərlik və Hərbi Xidmətə Çağırış üzrə Dövlət Xidmətinin rayon şöbələrinə müraciət edərək döyüşmək istədiklərini bildirirdilər. Bu, gənclərimizin Vətənə, xalqa qarşı böyük sevgisinin, vətənpərvərlik ruhunun təcəssümü idi. Dövlətimizin başçısının, Ali Baş Komandan İlham Əliyevin “İrəli, Azərbaycan əsgəri!” çağırışına cavab verən gənclərimiz böyük əzm, yenilməz güc nümayiş etdirərək mümkünsüzü mümkün etdilər. On illərlə işğal altında qalan torpaqlarımızda düşmənin qurduğu möhkəm istehkamları Azərbaycan Ordusu darmadağın etdi. Mənfur düşməni, onun havadarlarını qüdrətli Azərbaycanın şanlı Qələbəsi sarsıtdı. Çətin relyef şəraitində düşmənin ötən illərdə qurduğu keçilməz sədləri Ordumuz peşəkarlıq, məharət, güc, hərbi elm sayəsində dəf etdi”.
Müzəffər Ali Baş Komandan Vətən müharibəsində gənc nəslin mühüm rolunu xüsusi vurğulayıb. Bildirib ki, ölkəmizdə yetişən gənc nəsil öz qanı-canı bahasına torpağımızı düşmən əlindən aldı: “Müharibədə bütün nəsillərin nümayəndələri iştirak ediblər, qəhrəmanlıq göstəriblər. Amma hər kəs bilməlidir ki, əsas missiyanı mənim prezidentlik dövrümdə yetişən gənclər yerinə yetiriblər, 2003-cü ildə uşaq olan gənclər yerinə yetiriblər”.
Ekspertin sözlərinə görə, bu gün gənclərimiz Azərbaycanın xarici ölkələrdə ən böyük təbliğatçılarıdır: “İdmançılarımız beynəlxalq yarışlarda fəxr edirlər ki, müzəffər ölkənin və qalib xalqın təmsilçiləridir. Bu il müxtəlif idman növlərində komandalarımız dünya, Avropa çempionatlarının, nüfuzlu yarışların qalib və mükafatçıları olublar. Vətənpərvərliyi gücləndirən amillərdən biri də tarixi-hərbi Zəfərimizdir ki, bu böyük qələbə idmançılarımıza yenilməz güc bəxş edib”.
Qüdrət Nuriyev Azərbaycan xalqının, Ordusunun məhz dövlətimizin ətrafında bir yumruq kimi sıx birləşməsi sayəsində daha qüdrətli ölkə formalaşması istiqamətində gələcəyə hesablanmış çox vacib addımların atıldığını vurğulayıb.
“Vətən müharibəsində əldə edilən Qələbənin açdığı böyük imkanlar nəticəsində Azərbaycan bu gün tam olaraq Qarabağa nəzarəti bərpa edib. 2023-cü ilin sentyabrında heç bir gün də çəkməyən antiterror tədbirlərində Qarabağda qanunsuz erməni silahlı birləşmələri diz çökdü, separatizmə son qoyuldu. Bu gün tam əminliklə deyə bilərik ki, ölkəmizin ərazi bütövlüyünün bərpasının ən böyük arzusu olduğunu deyən Ulu Öndər Heydər Əliyevin ruhu şaddır. Bundan sonra Azərbaycanı İlham Əliyevin liderliyi ilə yeni zirvələr gözləyir. İşğaldan azad edilmiş ərazilərimizdə möhtəşəm dirçəliş dövrü başlayıb. Bərpa işlərinin sürəti və miqyası gündən-günə yüksəlir. Erməni barbarların vaxtilə viran etdiyi yurd yerlərimizə işıqlı həyat qayıdır. Bu mərhələdə müstəqil Azərbaycanı daha böyük uğurlar gözləyir”, - deyə o əlavə edib.
Bölmənin digər xəbərləri
