Fəxrəddin Həsənzadə: Karantin zamanı gənclər təşkilatı kimi maksimum faydalı olmağa çalışdıq
Bakı, 30 aprel, AZƏRTAC
Karantin zamanı gənclər təşkilatı kimi maksimum faydalı olmağa çalışdıq. Gənclər üçün Təhsil Mərkəzi olaraq martın 6-dan bu günə kimi koronavirus infeksiyasının ölkəmizdə yayılmasına qarşı qəbul edilmiş təcili, təxirəsalınmaz və icrası məcburi olan qərarların təmin olunması məqsədilə “İnteqrasiya olunmuş sosial xidmətlər” layihəsi çərçivəsində “Elektron keys menecment” sistemini yaratdıq.
Bu barədə AZƏRTAC-a Gənclər üçün Təhsil Mərkəzinin icraçı direktoru Fəxrəddin Həsənzadə bildirib. O qeyd edib ki, Ağcabədi rayonu və Şirvan şəhərində müraciətlərə operativ baxılması, cavablandırılması və həlli üçün ümumilikdə 7 sosial işçi, 3 psixoloq, 3 pedaqoq və 2 uşaq inkişafı mütəxəssisi, iki hüquqşünas və 2 regional koordinatordan ibarət operativ işçi qrupu fəaliyyət göstərib.
Mərkəzə daxil olan müraciətlər əsasında sosial müavinətlər, əlilliyin rəsmiləşdirilməsi, aliment tələbinin yerinə yetirilməməsi, əlil arabaları və digər avadanlıqlara olan ehtiyacın təmin edilməsi, SİM uşaqların reabilitasiya proqramlarına cəlb olunması və s. istiqamətlərdə sosial işin təşkili həyata keçirilib. Hər iki regionda ümumilikdə baxımsız və sosial təhlükəli vəziyyətdə olan uşaqlar üçün göstərilən xidmət sayı 94, inkişaf geriliyi və əlilliyi olan uşaqlar üçün göstərilən xidmət sayı 143 olub. Həmçinin mərkəzimiz Heydər Əliyev Fondunun vitse-prezidenti Leyla xanım Əliyevanın çağırışına qoşularaq #EvdəQalaraqYaşat kampaniyası çərçivəsində qanvermə aksiyalarını təşkil edib. Belə ki, qanvermə aksiyaları aprelin 8-də Bakı şəhərində, aprelin 13-də Şirvan şəhərində, aprelin 15-də isə Mingəçevir şəhərində keçirilib.
Bununla yanaşı, əhaliyə birdəfəlik 190 manat ödəmənin şamil edilməsi ilə əlaqədar Şirvan şəhərində və Ağcabədi rayonunda fəaliyyət göstərən operativ işçi qrupu tərəfindən 500-dən çox şəxsə “e-sosial.az” portalında işsiz kimi qeydiyyata alınmaqda, 100 dən çox aztəminatlı ailənin ərzaq tədarükü ilə təmin edilməsinə köməklik göstərilib.
Mərkəz olaraq ABŞ-ın Beynəlxalq İnkişaf Agentliyinin (USAID) maliyyə dəstəyi ilə BMT-nin Uşaq Fondunun (UNICEF) Azərbaycan nümayəndəliyi tərəfindən koronavirus (COVID-19) pandemiyası ilə bağlı ölkəmizdə həyata keçirilən ictimai maarifləndirmə layihəsinə qoşularaq regionlarda maarifləndirici materialların paylanması, eyni zamanda, sakinlərə infeksiyadan qorunmaq üçün şəxsi gigiyena qaydalarına əməl olunması və sosial təcridolmanın vacibliyi barədə məlumatlar verilib.
Bölmənin digər xəbərləri
