Filippində şagird və tələbələr təhsil müddətində ağac əkməli olacaqlar
Bakı, 2 noyabr, AZƏRTAC
Filippin 1990-2005-ci illərdə ağacların vəhşicəsinə kəsilməsi nəticəsində öz meşələrinin təqribən üçdəbir hissəsini itirib. AZƏRTAC xarici KİV-lərə istinadla xəbər verir ki, Filippin parlamentinin deputatları Qari Alexano və Strayk Revilla bu problemi həll etmək üçün qanun layihəsi təklif ediblər. Qanun layihəsinə görə, bütün ibtidai və orta məktəb, kollec şagirdləri təhsil müddəti başa çatanadək azı 10 ağac əkməli, ali məktəb məzunları isə 30-dək ağac əkməlidirlər.
Qari Alexanonun sözlərinə görə, bu qanun qüvvəyə minərsə, hər il ölkədə azı 175 milyon ağac əkiləcək və bu rəqəm cəmi bir nəsil ərzində 525 milyon ağaca bərabər olacaq.
Qanun layihəsi tingyetişdirmə məntəqələrinin yaradılmasına və sahələrin hazırlanmasına bir sıra hökumət idarələri tərəfindən nəzarət edilməsini də nəzərdə tutur.
Filippin qanunvericilərinin təşəbbüsü planetimizdə meşələrin məhv edilməsi sürətinin fəlakətli həddə çatması baxımından vaxtında atılmış addımdır. Proqnozlara görə, 2030-cu ilə qədər təkcə Avstraliyada 3 milyon hektar meşə sahəsi yer üzündən silinəcək. Milyonlarla yeni ağacın əkilməsi Yer kürəsinin irimiqyaslı ekoloji böhrandan xilas olmasına kömək edəcək.
Bölmənin digər xəbərləri
